(បរទេស)៖ ក្រុមហ៊ុន Neuralink ដែលជាក្រុមហ៊ុនបំពាក់បន្ទះឈីបក្នុងខួរក្បាលមនុស្សរបស់លោក Elon Musk បានប្រកាសនៅថ្ងៃព្រហស្បតិ៍សប្តាហ៍នេះថា ខ្លួននឹងចាប់ផ្តើមការសិក្សាព្យាបាលមួយនៅចក្រភពអង់គ្លេស។ ការសាកល្បងនេះមានគោលបំណងចង់ដឹងថា តើបន្ទះឈីបរបស់ពួកគេអាចជួយអ្នកជំងឺដែលមានអាការៈខ្វិនធ្ងន់ធ្ងរឱ្យគ្រប់គ្រងឧបករណ៍ឌីជីថល និងឧបករណ៍ផ្សេងៗបានដោយប្រើគំនិតរបស់ពួកគេដោយរបៀបណា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០១ ខែសីហា ឆ្នាំ២០២៥។

យោងតាមការបង្ហោះនៅលើបណ្តាញសង្គម X បានឱ្យដឹងថា ការសិក្សានេះនឹងធ្វើឡើងនៅមន្ទីរពេទ្យ University College London Hospitals និង Newcastle Hospitals។ ចំពោះអ្នកជំងឺដែលមានអាការៈខ្វិនដោយសារមូលហេតុដូចជា របួសឆ្អឹងខ្នង និងជំងឺប្រព័ន្ធប្រសាទដែលហៅថា Amyotrophic Lateral Sclerosis (ALS) មានលក្ខណៈគ្រប់គ្រាន់ក្នុងការចូលរួមក្នុងការសិក្សានេះ។

គួរជម្រាបថា បច្ចុប្បន្ន មានអ្នកជំងឺចំនួន ៥ នាក់កំពុងប្រើប្រាស់ឧបករណ៍នេះនៅសហរដ្ឋអាមេរិក។ ក្រុមហ៊ុន Neuralink ដែលត្រូវបានបង្កើតឡើងក្នុងឆ្នាំ ២០១៦ បានរៃអង្គាសថវិកាបានប្រមាណ ១.៣ ពាន់លានដុល្លារពីវិនិយោគិន ហើយត្រូវបានវាយតម្លៃថាមានតម្លៃប្រហែល ៩ ពាន់លានដុល្លារ នេះបើយោងតាមរបាយការណ៍របស់ប្រព័ន្ធផ្សព្វផ្សាយដែលដកស្រង់ពី PitchBook៕