ប៉េង ហួត គ្រុប ទទួលស្វាគមន៍គណៈប្រតិភូវិស័យឯកជននៃសហភាពមីយ៉ាន់ម៉ា ក្នុងដំណើរទស្សនកិច្ចស្វែងយល់អំពីឱកាសធុរកិច្ច និងវិនិយោគនៅកម្ពុជា
01-08-2025 17:27
(ភ្នំពេញ)៖ ក្រុមហ៊ុន ប៉េង ហួត គ្រុប បានទទួលស្វាគមន៍យ៉ាងកក់ក្ដៅ និងបានធ្វើបទបង្ហាញអំពីសក្ដានុពលអាជីវកម្ម និងគម្រោងធុរកិច្ចសំខាន់ៗរបស់ ប៉េង ហួត គ្រុប ចំពោះគណៈប្រតិភូវិស័យឯកជននៃសហភាពមីយ៉ាន់ម៉ា (ភូមា) ចំនួន ៥៤នាក់ តាមរយៈមជ្ឈមណ្ឌលជំរុញធុរកិច្ចអន្តរជាតិ នៃសហភាពមីយ៉ាន់ម៉ា ដឹកនាំដោយ លោក Aik Htun ប្រធានមជ្ឈមណ្ឌលជំរុញធុរកិច្ចអន្តរជាតិ នៃសហភាពមីយ៉ាន់ម៉ា និងឯកអគ្គរាជទូតកម្ពុជា ប្រចាំសហភាពមីយ៉ាន់ម៉ា ក្នុងដំណើរទស្សនកិច្ចស្វែងយល់អំពីឱកាសធុរកិច្ច និងវិនិយោគនៅកម្ពុជា នាថ្ងៃទី៣១ ខែកក្កដា ឆ្នាំ២០២៥ ស្ថិតនៅគម្រោងបុរី ប៉េង ហួត ហ្រ្គេនស្ដា ផ្លាទីនីម (បឹងស្នោ)។
ដំណើរទស្សនកិច្ចមកកាន់ ប៉េង ហួត គ្រុប ទទួលបានផ្លែផ្កាល្អជាច្រើន ដោយគណៈប្រតិភូវិស័យឯកជននៃសហភាពមីយ៉ាន់ម៉ា បានបង្ហាញចំណាប់អារម្មណ៍ចំពោះវិសាលភាព និងវឌ្ឍនភាពអាជីវកម្មរបស់ ប៉េង ហួត គ្រុប នៅក្នុងទីផ្សារកម្ពុជា ព្រមទាំងបានជជែកការងារលើកិច្ចសហប្រតិបត្តិការវិនិយោគនៅ ប៉េង ហួត គ្រុប ក្នុងពេលអនាគតឆាប់ៗ៕
