(ភ្នំពេញ)៖ ក្រុមព្រះខ័នរាជស្វាយរៀង ក្នុងនាមក្រុមជើងឯកលីគកំពូលកម្ពុជា និងត្រូវជួបក្រុមភ្នំពេញក្រោន ដែលជាក្រុមជើងឯកពានរង្វាន់សម្ដេចតេជោ ហ៊ុន សែន លើកទី១៨ នាល្ងាចថ្ងៃទី៣ ខែសីហាស្អែកនេះ នៅក្នុងជំនួបពានរង្វាន់បើករដូវកាលថ្មី Krud Cambodian Super Cup 2025 នៅពហុកីឡដ្ឋានជាតិ(អូឡាំពិក)។

នេះគឺជាលើកទី២ ដែលក្រុមទាំងពីរ បានជួបគ្នាក្នុងពានរង្វាន់បើករដូវកាលថ្មីនេះ ដ្បិតកាលពីឆ្នាំមុន ក្នុងនាមក្រុមជើងឯកទាំងលីគ និងពានសម្ដេចតេជោ ព្រះខ័នរាជស្វាយរៀង បានគ្រងជើងឯកពាននេះ បន្ទាប់ពីយកឈ្នះក្រុមជើងឯករងភ្នំពេញក្រោន ដោយលទ្ធផល ២-១ ។ ដូច្នេះចាំមើលតើក្រុមណា នឹងក្លាយជាម្ចាស់ពានបើករដូវកាលថ្មីនេះ?

សម្រាប់ជំនួបក្រុមខ្លាំងទាំងពីរ ពិតជាគួរឲ្យចាប់អារម្មណ៍ បន្ទាប់ពីការរុះរើស និងពង្រឹងក្រុមរៀងៗខ្លួន ទាំងកីឡាករក្នុងស្រុក ក៏ដូចជាកីឡាករបរទេស ដើម្បីត្រៀមរដូវកាលថ្មី ក៏ដូចជាត្រៀមលេងពានរង្វាន់អន្ដរជាតិផងដែរ ។ ដូច្នេះជំនួបផ្លូវការថ្ងៃអាទិត្យនេះ គេរំពឹងថា នឹងក្លាយជាការប្រកួតដ៏កក្រើកមួយ បន្ទាប់ពីក្រុមទាំងពីរ បានបញ្ចប់ដំណាក់កាល Pre-Season ទាំងនៅកម្ពុជា និងនៅម៉ាឡេស៊ីដូចគ្នា នាពេលកន្លងមក។

ក្រឡេកមកចាប់អារម្មណ៍សំបុត្រចូលទស្សនាការប្រកួតរវាងក្រុមជើងឯកលីគកំពូលកម្ពុជា និងក្រុមជើងឯកពានសម្ដេចតេជោ ហ៊ុន សែន នេះដែរ ក្រុមហ៊ុនខេមបូឌានព្រីមៀរលីគ បានប្រកាសដាក់លក់តាំងពីថ្ងៃទី១ ខែសីហា ដោយបែងចែកជា ២ប្រភេទ រួមមានសំបុត្រប្រភេទ A មានតម្លៃ ១ម៉ឺនរៀល និងសំបុត្រប្រភេទB មានតម្លៃ ៤ពាន់រៀល ដែលអ្នកគាំទ្រអ្នករកទិញផ្ទាល់នៅពហុកីឡដ្ឋានជាតិអូឡាំពិក ឬទិញសំបុត្រអនឡាញតាមរយៈប្រព័ន្ធ Stadium X។

គួរដឹងថា ក្រោយបញ្ចប់ការប្រកួតពានរង្វាន់បើករដូវកាលថ្មីខាងលើ លីគកំពូលកម្ពុជា ឆ្នាំ២០២៥/២៦ នឹងត្រូវចាប់ផ្ដើមការប្រកួតរដូវកាលថ្មី នៅថ្ងៃទី៩-១០ ខែសីហា ឆ្នាំ២០២៥ ខាងមុខ ។ ដំណាលគ្នា ភ្នំពេញក្រោន ក៏នឹងត្រូវត្រៀមលេងវគ្គជម្រុះបឋម (Preliminary round) នៃពានរង្វាន់កម្រិតទី៣ ទ្វីបអាស៊ី AFC Challenge League 2025/26 ដោយត្រូវជួបក្រុមខ្លាំងប្រ៊ុយណេ Kasuka FC នាថ្ងៃទី១២ ខែសីហា ឆ្នាំ២០២៥ ខាងមុខផងដែរ។

ចំណែកព្រះខ័នរាជស្វាយរៀង ក្រៅពីបេសកកម្មការពារជើងឯកលីគ ពួកគេនឹងត្រូវត្រៀមយុទ្ធនាការប្រកួតជើងឯកក្លិបបាល់ទាត់អាស៊ីអាគ្នេយ៍ ASEAN Club Championship Shopee Cup 2025/26 ដែលត្រូវចាប់ផ្ដើមប្រកួតពីតថ្ងៃទី២១ ខែសីហា ឆ្នាំ២០២៥ ខាងមុខ ព្រមទាំងត្រៀមខ្លួនលេងជើងឯកក្លិបបាល់ទាត់កម្រិតទី៣ ទ្វីបអាស៊ី AFC Challenge League 2025/26 ដែលនឹងត្រូវធ្វើការចាប់ឆ្នោតបែងចែកពូលប្រកួតនៅថ្ងៃទី២ ខែសីហានេះផងដែរ បន្ទាប់ពីទទួលបានជើងឯករង កាលពីឆ្នាំមុន៕