(បរទេស)៖ ក្រុមហ៊ុនអាហារសម្រន់ដ៏ធំរបស់អាមេរិក McDonald's មានគម្រោងបង្កើនការវិនិយោគលើបច្ចេកវិទ្យាបញ្ញាសិប្បនិម្មិត (AI) ទ្វេដងត្រឹមឆ្នាំ ២០២៧ ហើយនឹងផ្តោតលើប្រទេសឥណ្ឌាជាមជ្ឈមណ្ឌលដ៏សំខាន់សម្រាប់ការគ្រប់គ្រងទិន្នន័យ វិស្វកម្ម និងវេទិកាស្ថាបត្យកម្ម។ នេះបើយោងតាមការលើកឡើងរបស់អ្នកដឹកនាំជាន់ខ្ពស់ម្នាក់របស់ក្រុមហ៊ុនបានប្រាប់ទីភ្នាក់ងារសារព័ត៌មាន Reuters នៅថ្ងៃទី០១ ខែសីហា ឆ្នាំ២០២៥។

លោក Deshant Kaila ប្រធានប្រតិបត្តិការសេវាធុរកិច្ចសកលរបស់ក្រុមហ៊ុន McDonald's បានថ្លែងនៅក្នុងព្រឹត្តិការណ៍មួយថា៖ «យើងនៅតែស្ថិតក្នុងដំណាក់កាលដំបូង ដូច្នេះវាពិបាកក្នុងការកំណត់ឱ្យបានច្បាស់លាស់ពីចំនួនទឹកប្រាក់វិនិយោគពិតប្រាកដ»។

លោក Kaila បានបន្តថា ការវិនិយោគនៅក្នុងប្រទេសឥណ្ឌានេះនឹងផ្តោតលើការកសាងក្រុមការងារ AI ប៉ុន្តែការចំណាយនឹងផ្ដោតសំខាន់លើបច្ចេកវិទ្យា និងឧបករណ៍ជាជាងការបង្កើនចំនួនបុគ្គលិក៕