(បរទេស)៖ គណៈកម្មការមូលបត្រ និងផ្សារភាគហ៊ុនសហរដ្ឋអាមេរិក (U.S. Securities and Exchange Commission - SEC) នៅថ្ងៃសុក្រសប្តាហ៍នេះបានប្រកាសថា ខ្លួនកំពុងបង្កើតក្រុមការងារសម្រាប់បច្ចេកវិទ្យាបញ្ញាសិប្បនិម្មិត (AI) ដើម្បីដឹកនាំកិច្ចខិតខំប្រឹងប្រែងរបស់ទីភ្នាក់ងារ ក្នុងការ «លើកកម្ពស់ការច្នៃប្រឌិត និងប្រសិទ្ធភាព» ក្នុងប្រតិបត្តិការរបស់ខ្លួន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០២ ខែសីហា ឆ្នាំ២០២៥។

និយ័តករបាននិយាយក្នុងសេចក្ដីថ្លែងការណ៍ថា អ្នកស្រី Valerie Szczepanik ដែលត្រូវបានតែងតាំងជាប្រធានផ្នែក AI របស់ SEC នឹងដឹកនាំក្រុមការងារនេះ។ យោងតាមសេចក្ដីថ្លែងការណ៍របស់ SEC ក្រុមការងារនេះនឹងធ្វើសមាហរណកម្ម AI ទៅក្នុងបេសកកម្មរបស់ខ្លួនក្នុងការការពារវិនិយោគិន រក្សាទីផ្សារឲ្យមានភាពយុត្តិធម៌ រៀបរយ និងមានប្រសិទ្ធភាព។

គួរជម្រាបថា អ្នកស្រី Valerie Szczepanik ត្រូវបានគេស្គាល់ថាជា «Crypto Czar» ដោយសារតួនាទីសំខាន់របស់គាត់ក្នុងវិស័យទ្រព្យសម្បត្តិឌីជីថល (digital assets)។ មុនពេលកាន់តំណែងថ្មីនេះ អ្នកស្រីធ្លាប់ជាប្រធានមជ្ឈមណ្ឌលយុទ្ធសាស្ត្រសម្រាប់ការច្នៃប្រឌិត និងបច្ចេកវិទ្យាហិរញ្ញវត្ថុ (FinHub) របស់ SEC។ ក្នុងតួនាទីនោះ អ្នកស្រីបានសម្របសម្រួលកិច្ចការងាររបស់ SEC លើបច្ចេកវិទ្យាជាច្រើនដូចជា រូបិយប័ណ្ណគ្រីបតូ (cryptocurrencies) និងប្លុកឆេន (blockchain)។ អ្នកស្រីបានចាប់ផ្តើមធ្វើការនៅ SEC តាំងពីឆ្នាំ ១៩៩៧ ហើយធ្លាប់បម្រើការជាអនុប្រធានផ្នែកអនុវត្តច្បាប់ (Division of Enforcement) នៃអង្គភាព Cyber Unit៕