(ភ្នំពេញ)៖ ដូចអ្វីដែលបានសន្យាកាលពីពេលថ្មីៗនេះថា ក្រុមហ៊ុន GANZBERG នឹងចូលរួមរំលែកទុក្ខដល់គ្រួសារកងទ័ពដោយផ្ទាល់ ដែលបានពលីជីវិតក្នុងសមរភូមិប្រយុទ្ធ ជាមួយសត្រូវឈ្លានពានកម្ពុជា នឹងបានផ្ដល់ជូនដល់គ្រួសាររកងទ័ព ​ដែលបានពលីក្នុងសមរភូមិប្រយុទ្ធចំនួនពីររូប ដោយគ្រួសារម្នាក់ៗទទួលបានផ្ទះ១ខ្នង និងថវិកា ១០លានរៀល។

ជាក់ស្ដែងនៅថ្ងៃទី០២ ខែសីហា ឆ្នាំ២០២៥នេះ ថ្នាក់ដឹកនាំ ក៏ដូចជាបុគ្គលិកក្រុមហ៊ុន GANZBERG បានចុះទៅជួបផ្ទាល់ដល់ផ្ទះគ្រួសារកងទ័ព​ ដែលបានពលីក្នុងសមរភូមិប្រយុទ្ធ វីរកងទ័ពពលី ឈ្មោះ សុទ ប៊ុនធឿន នៅក្នុងភូមិស្រែកណ្តោល ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ នឹងបានផ្ដល់ជូនដល់​ ផ្ទះ១ខ្នង និងថវិកា ១០លានរៀលបន្ថែមទៀត។

សូមបញ្ជាក់ថា កងទ័ព​ដែលបានពលីក្នុងសមរភូមិប្រយុទ្ធចំនួនពីររូបនោះ គឺគ្រួសារទី១ វីរៈកងទ័ពពលី ឈ្មោះ សុទ ប៊ុនធឿន ភូមិស្រែកណ្តោល ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ និងគ្រួសារទី២ វីរៈកងទ័ពពលី ឈ្មោះ ប៊ី សុខគា នៅភូមិភ្នំដែក ឃុំរមណីយ ស្រុករវៀង ខេត្តព្រះវិហារ។

ក្នុងវេលាដ៏លំបាកនេះក្រុមហ៊ុន GANZBERG សូមសម្តែងនូវសមានទុក្ខដ៏ធំធេង និងសោកស្តាយស្រណោះអាឡោះអាល័យជាទីបំផុត ចំពោះមរណភាព នឹងសូមបូងសួងឧទ្ទិសដល់គុណបុណ្យព្រះរតនត្រ័យ ជួយដល់ដួងវិញ្ញាណក្ខន្ធវីរកងទ័ពពលីទាំងពីររូប សូមឆាប់បានយោនយោគកំណើត ចាប់បដិសន្ធិក្នុងសុគតិភព កុំបីឃ្លៀងឃ្លាតឡើយ៕