(បរទេស)៖ អាជ្ញាធរប្រឆាំងការប្រកួតប្រជែងរបស់ប្រេស៊ីល CADE បានបើកការស៊ើបអង្កេតលើក្រុមហ៊ុន Microsoft បន្ទាប់ពីក្រុមហ៊ុន Opera បានដាក់ពាក្យបណ្ដឹងចោទប្រកាន់ថា Microsoft បានដំឡើងកម្មវិធី Edge ជាកម្មវិធីរុករកលំនាំដើម (default browser) នៅលើប្រព័ន្ធ Windows ដែលរារាំងការប្រកួតប្រជែងដោយយុត្តិធម៌។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០២ ខែសីហា ឆ្នាំ២០២៥។

យោងតាមទិន្នន័យក្នុងខែមិថុនា Opera មានចំណែកទីផ្សារកម្មវិធីរុករកលើកុំព្យូទ័រនៅប្រេស៊ីល ៦.៧៨% ខណៈ Edge មាន ១១.៥២% ហើយ Google Chrome ដែលជាក្រុមហ៊ុននាំមុខគេមានរហូតដល់ ៧៥%។ CADE បានបើកការស៊ើបអង្កេតរដ្ឋបាលហើយបានកំណត់ពេលថ្ងៃទី ១៥ ខែសីហា ជាកាលបរិច្ឆេទចុងក្រោយសម្រាប់ Microsoft ដើម្បីឆ្លើយតបទៅនឹងការចោទប្រកាន់របស់ Opera ទាក់ទងនឹងអាជ្ញាប័ណ្ណប្រព័ន្ធប្រតិបត្តិការ Windows កម្មវិធី Microsoft 365 និងកម្មវិធី Jumpstart របស់ខ្លួន។

ទាក់ទងនឹងបញ្ហានេះ ក្រុមហ៊ុន Microsoft មិនទាន់បានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។

គួររំលឹកថា ក្រុមហ៊ុន Opera ក៏ធ្លាប់បានប្ដឹង Microsoft លើករណីស្រដៀងគ្នានេះកាលពីឆ្នាំ ២០០៧ នៅអឺរ៉ុបដែរ ដែលបណ្ដាលឲ្យ Microsoft ត្រូវពិន័យជាប្រាក់ដល់ទៅ ៥៦១ លានអឺរ៉ូ (ប្រហែល ៦៤០ លានដុល្លារ)៕