(មេនឆេស្ទើ)៖ បិសាចក្រហម Manchester United បានសម្រេចដាក់លក់ខ្សែប្រយុទ្ធ Rasmus Hojlund របស់ខ្លួន ក្នុងតម្លៃប្រមាណ ៣០លានផោន ក្នុងទីផ្សារទិញ-ដូរកីឡាករដែលនឹងបិទទ្វារវិញនាដើមខែកញ្ញា ឆ្នាំ២០២៥ ក្រោយទិញចូលបាន ២ឆ្នាំ។

ពីគេហទំព័រកីឡា BBC បានចេញផ្សាយថា Man Utd ដែលបានបញ្ចប់ក្នុងចំណាត់ថ្នាក់លេខ១៥ នៅ Premier League រដូវកាលមុន បានទិញកីឡាករអន្តរជាតិដាណឺម៉ាក Hojlund ពីក្លិប Atalanta លេងនៅ Serie A ក្នុងតម្លៃ ៤៣លានផោនកាលឆ្នាំ២០២៣ ជាមួយនឹងកិច្ចសន្យា ៥ឆ្នាំផងដែរលេងនៅទឹកដី Old Trafford។

Hojlund ក៏រកបាន ២គ្រាប់ផងដែរទល់នឹងក្រុម AFC Bournemouth នៃជំនួបមិត្តភាពអន្តរជាតិនៅទីក្រុង Chicago សហរដ្ឋអាមេរិកកាលពីថ្ងៃពុធ ដោយរូបគេនៅតែមានបំណងលេងឱ្យ Man Utd ដដែលបើទោះបីជាក្លិបកំពុងចាប់អារម្មណ៍ខ្សែប្រយុទ្ធរបស់ RB Leipzig គឺ Benjamin Sesko ក៏ដោយ។

ទោះជាយ៉ាងណា ស្ថានភាពរបស់ Hojlund នឹងមានការប្រែប្រួលខ្លាំង ប្រសិនបើ Sesko មកដល់។

គិតមកទល់ពេលនេះ United បានចាយអស់ជិត ១៣០លានផោនហើយទៅលើកីឡាករ Bryan Mbeumo និង Matheus Cunha៕