(ភ្នំពេញ)៖ ធនាគារ វីង បានចាប់ផ្ដើមយុទ្ធនាការរៃអង្គាសជំនួយសប្បុរសធម៌ពីសាធារណជនដើម្បីជួយដល់ប្រជាពលរដ្ឋ ដែលត្រូវបានជម្លៀសចេញពីលំនៅឋាន ដោយសារភាពតានតឹងនៅតាមព្រំដែននាពេលថ្មីៗនេះ។ គំនិតផ្ដួចផ្ដើមនេះមានគោលបំណងប្រមូលផ្តុំនូវកម្លាំងសាមគ្គីជាតិជា ធ្លុងមួយដើម្បីជួយដល់ជនស៊ីវិលរាប់ពាន់នាក់ដែលកំពុងជួបការលំបាកជាខ្លាំង។

លោក ហោ ប៊ុនថែ អគ្គនាយករងធនាគារ វីង បានលើកឡើងថា៖ នេះ «ជាពេលវេលាដែលយើងជាខ្មែរតែមួយត្រូវរួមកម្លាំងសាមគ្គីគ្នា។ សូមចូលរួមជួយ ពួកគាត់ឱ្យរួចចាកពីទុក្ខក្នុងគ្រាមានអាសន្ននេះ ក៏ដូចជា ស្ដារជីវភាពរស់នៅឱ្យ បាន សមរម្យ ជាថ្មី ម្តង ទៀត» ។

សប្បុរសជន អាចចូលរួមបរិច្ចាគថវិកា បានតាមរយៈអេប ធនាគារ វីង (Wing Bank) ឬក៏ នៅ តាម សាខាធនាគារ វីង និងភ្នាក់ងារ ធនាគារ វីងទូទាំងប្រទេសដោយមិនគិតថ្លៃសេវាឡើយ។ ជាមួយគ្នានេះ ផងដែរ សប្បុរសជន ក៏អាចបរិច្ចាគនូវ គ្រឿង ឧបភោគបរិភោគ ដែល មានដូចជាចំណីអាហារ និង សម្ភារៈចាំបាច់ផ្សេងៗដើម្បីទ្រទ្រង់ការរស់នៅរបស់ប្រជាជន ភៀសសឹក។

សម្រាប់ការបរិច្ចាគជាចំណីអាហារ និង សម្ភារៈចាំបាច់ផ្សេងៗ សប្បុរសជន អាចយកទៅប្រគល់ជូនដោយផ្ទាល់នៅតាមទីតាំងមួយចំនួនដូចជា៖ ចំណតយាន្តយន្ត ធនាគារ វីង, ការិយាល័យ ក្រុមហ៊ុន សែលកាត, ស្ថានីយទូរទស្សន៍ស៊ីធីអិន, សាលាអន្តរជាតិសៅប្រ៊ីដកម្ពុជា, សាលាណតប្រ៊ីដអន្តរជាតិ, ការិយាល័យក្រុមហ៊ុន អ៊ីនហ្វីនីធី សណ្ឋាគារ កាំបូឌីយ៉ាណា និង សមាគមសិល្បករខ្មែរ ។

រាល់ថវិកា និងសម្ភារៈដែលបានបរិច្ចាគនឹងត្រូវគ្រប់គ្រង និងចាត់ចែងដោយមូលនិធិទ្រទ្រង់ជនភៀសសឹក ដើម្បីធានាថាជំនួយបានទៅដល់ដៃគ្រួសាររងគ្រោះដោយផ្ទាល់ទាន់ពេលវេលា និងមានប្រសិទ្ធភាព។ មូលនិធិនេះត្រូវបានផ្តួចផ្តើមឡើងដោយអ្នកឧកញ៉ា គិត ម៉េង និង លោកជំទាវ អ្នកឧកញ៉ា ម៉ៅ ចំណាន ដោយមានការចូលរួម ពីសមាជិក នៃក្រុមហ៊ុន រ៉ូយ៉ាគ្រុប ។
ធនាគារ វីង បានគូសបញ្ជាក់ថាយុទ្ធនាការនេះបង្ហាញពីការប្តេជ្ញាចិត្តយ៉ាងមុតមាំក្នុងការចូលរួមចំណែកលើកកសាងកម្លាំងស្មារតីសាមគ្គីភាពជាតិ និងការគាំទ្រផ្នែកមនុស្សធម៌ក្នុងគ្រាដ៏លំបាកនេះ៕

ដើម្បីបរិច្ចាគសូមស្កេន KHQR ឬចុចលើតំណភ្ជាប់ខាងក្រោម៖

*ប្រាក់រៀល៖ https://wingbank.onelink.me/jA7d/8oxomq5j
*ប្រាក់ដុល្លារ៖ https://wingbank.onelink.me/jA7d/emdnntlg

ទីតាំងបរិច្ចាគចំណីអាហារ និង សម្ភារៈ ៖
• ចំណតយានយន្តធនាគារ វីង - https://maps.app.goo.gl/drogDniu4o5vSx7d7
• ការិយាល័យកណ្តាល សែលកាត - https://maps.app.goo.gl/8SpZKNSroYbeAUCo7
• សណ្ឋាគារ កាំបូឌីយ៉ាណា - https://maps.app.goo.gl/Ea7JPQjWqonTUUt4A
• ការិយាល័យ CTN/CNC - https://maps.app.goo.gl/8cBmAmnr46QiaUrL9
• សាលាអន្តរជាតិ Northbridge - https://maps.app.goo.gl/y2tUctkX2mPwaxpP9
• សាលាអន្តរជាតិ Southbridge - https://maps.app.goo.gl/NArerfcUxwrxZUZC8
• ការិយាល័យកណ្តាល ក្រុមហ៊ុនធានារ៉ាប់រង Infinity - https://maps.app.goo.gl/EHLFeM8GFeJydv1UA
• ការិយាល័យកណ្តាល សមាគមសិល្បករខ្មែរ - https://maps.app.goo.gl/8bDdae2ZfqV1zu3WA