ផ្លូវការ! Chelsea ទិញបានខ្សែការពារ Hato ពីក្លិប Ajax ក្នុងតម្លៃជិត ៤០លានផោន ជាសមាជិកថ្មីទី៨

04-08-2025 09:03

(ឡុងដ៍)៖ តោខៀវ Chelsea ទិញបានខ្សែការពារអន្តរជាតិហូឡង់ Jorrel Hato ពីក្លិប Ajax ក្នុងតម្លៃ ៣៧លានផោន ដែលជាសមាជិកថ្មីទី៨ របស់ក្រុមតោខៀវនារដូវកាលទិញ-ដូរកីឡាកររដូវក្តៅនេះ។ នេះបើយោងតាមការចេញផ្សាយដោយ BBC។

Hato វ័យទើបតែ ១៩ឆ្នាំ បានព្រមព្រៀងចុះកិច្ចសន្យាលេងនៅ Stamford Bridge រយៈពេល ៧ឆ្នាំ បន្ទាប់ពីពិនិត្យសុខភាពរួចកាលពីចុងសប្តាហ៍កន្លងទៅ ស្របពេលកីឡាករយុវជនរូបនេះ ក៏ធ្លាប់បង្ហាញខ្លួនក្នុងក្រុមធំទឹកក្រូចហូឡង់បានចំនួន ៦ប្រកួតមកដែរ។

Hato ធ្លាប់ជាប្រធានក្រុមក្នុងឈុត U17 ហូឡង់ ដែលរូបគេអាចលេងបានទាំងការពារកណ្តាល និងស្លាបឆ្វេង ដែលត្រូវបានជ្រើសរើសលេងក្នុងក្រុមធំកាលឆ្នាំ២០២៣ នៅពេលហូឡង់ ប្រកួតទល់នឹងក្រុមជម្រើសជាតិហ្ស៊ីប្រាតា នៃការបង្ហាញខ្លួនលើកដំបូងរបស់គេ។

រូបគេបានក្លាយជាសមាជិកថ្មីទី៨ របស់ក្រុមជើងឯក FIFA Club World Cup 2025 និងពាន UEFA Europa Conference League 2024-25 ក្រោយការមកដល់របស់កីឡាករ Jamie Gittens, Joao Pedro, Liam Delap, Mamadou Sarr, Dario Essugo, Estevao Willian និង Kendry Paez៕