(សៀងហៃ)៖ កីឡាករស្នូកឃ័រលេខ២ ពិភពលោក Kyren Wilson បានគ្រងតំណែងជើងឯក Shanghai Masters 2025 របស់ចិន អមដោយប្រាក់រង្វាន់ ២១០,០០០ផោន ក្រោយយកឈ្នះគូប្រជែង Ali Carter ដោយលទ្ធផល ១១-៩ នៅវគ្គផ្តាច់ព្រ័ត្រយប់មិញ។ នេះបើយោងតាមការចេញផ្សាយដោយ BBC។

នេះជាលើកទី២ ផងដែរសម្រាប់កីឡាករអន្តរជាតិអង់គ្លេស បន្ទាប់ពីឈ្នះលើកដំបូងក្នុងឆ្នាំ២០១៥ ក្នុងនាមអតីតម្ចាស់ជើងឯកពិភពលោក កាលពីឆ្នាំ២០២៤ កន្លងទៅថ្មីៗនេះ។

Wilson វ័យ ៣៣ឆ្នាំធ្វើបានជ័យជម្នះ ២សិតជាប់គ្នាចុងក្រោយ នៃជំនួបដ៏តានតឹង ពោលគឺនៅពេលមានលទ្ធផលស្មើគ្នាបណ្តោះអាសន្ន ៩-៩ ដើម្បីទទួលបានទឹកប្រាក់ប្រមាណ ២១ម៉ឹនផោន ដែលជាចំនួនដ៏ច្រើនលើកទី១ ក្នុងកម្មវិធីថ្មីនេះ។

ទោះជាយ៉ាងណា កីឡាករជើងចាស់ Carter វ័យ ៤៦ឆ្នាំ ក៏ធ្លាប់ឈ្នះជើងឯក Shanghai Masters ម្តងដែរក្នុងឆ្នាំ២០១០ និងបានចូលលេងក្នុងកម្មវិធីនេះ ក្នុងនាមកីឡាករជំនួសឱ្យ Mark Allen របស់អៀរឡង់ខាងជើង ដែលបានដកខ្លួន ក្រោមហេតុផលផ្ទាល់ខ្លួន។

គួរកត់សម្គាល់ផងថា ទម្រាំបានក្លាយជាជើងឯក Shanghai Masters 2025 នេះ Wilson បានទម្លាក់សុទ្ធតែជើងខ្លាំងមានដូចជា Si Jialui, Ronnie O’Sullivan និងម្ចាស់ជើងឯកពិភពលោក ឆ្នាំ២០២៥ គឺ Zhao Xintong ថែមទៀតផង ដើម្បីឡើងមកកាន់ផ្តាច់ព្រ័ត្រ៕