(សេអ៊ូល)៖ Son Heung-min បានធ្វើពិធីលាអ្នកគាំទ្ររបស់ខ្លួន នៅពេលក្រុម Tottenham Hotspur ប្រកួតកំដៅសាច់ដុំទល់នឹង Newcastle United ស្ថិតក្នុងទីក្រុងសេអ៊ូល ប្រទេសកូរ៉េខាងត្បូងកាលពីរាត្រីថ្ងៃអាទិត្យ។ នេះបើយោងតាមការចេញផ្សាយដោយ BBC។

ប្រធានក្រុមជម្រើសជាតិកូរ៉េខាងត្បូងរូបនេះ ត្រូវបានសមាជិកក្រុម ក៏ដូចកីឡាករខាងគូប្រជែងឈរអមជាជួរកិត្តិយស នៅពេល Son ត្រូវបានប្តូរចេញនៅនាទី៦៥ និងទំនងជា ១ប្រកួតចុងក្រោយសម្រាប់ខ្សែប្រយុទ្ធវ័យ ៣៣ឆ្នាំផងដែរជាមួយ Spurs ក្នុងរយៈពេល ១០ឆ្នាំមកនេះ។

Son ត្រូវបានក្រុមមាន់ខ្នាយមាសទិញពីក្លិបអាល្លឺម៉ង់ Bayer Leverkusen កាលឆ្នាំ២០១៥ ក្នុងតម្លៃ ២២លានផោន និងត្រូវបានតែងតាំងជាប្រធានក្រុម Spurs តពី Hugo Lloris នាអំឡុងខែសីហា ឆ្នាំ២០២៣។

លទ្ធផលផ្លូវការនៃជំនួប pre-season បានបញ្ចប់ទៅដោយស្មើគ្នា ១-១ នៅក្នុងកីឡដ្ឋាន Seoul World Cup ដែល Son បានថ្លែងថា «ជាដំបូង ខ្ញុំមិនគិតថាយំទេ ក៏ប៉ុន្តែក្រោយពីស្តាប់ពាក្យ ២-៣ម៉ាត់ចេញពីមិត្តរួមក្រុម ចំពោះការចាកចេញពីក្លិបដែលខ្ញុំបានចំណាយពេលច្រើនបំផុតក្នុងអាជីពបាល់ទាត់ ធ្វើឱ្យខ្ញុំទប់ទឹកភ្នែកមិនជាប់តែម្តង។ ខ្ញុំពិតជាមានអារម្មណ៍សប្បាយរីករាយខ្លាំងណាស់ក្នុងប្រកួតនេះ។ សូមថ្លែងអំណរគុណចំពោះអ្នកគាំទ្រ មិត្តរួមក្រុម និងគូប្រជែងផងដែរ។ នេះជាថ្ងៃដែលខ្ញុំមិនអាចបំភ្លេចបានឡើយ»៕