(ភ្នំពេញ)៖ ក្លិបព្រះខ័នរាជស្វាយរៀង បានប្រកាសថា នឹងបរិច្ចាគប្រាក់រង្វាន់ទាំងអស់ ជូនដល់មូលនិធិគាំទ្រកងទ័ព និងជនភៀសសឹកភ្លាមៗ បន្ទាប់ពីបានក្លាយជាម្ចាស់ជើងឯកពានរង្វាន់បើករដូវកាលថ្មី Krud Cambodian Super Cup 2025 ក្រោយយកឈ្នះក្រុមភ្នំពេញក្រោន ដោយកាត់ទាត់បាល់ប៉េណាល់ទីកាត់សេចក្ដី ៥-៣ ។

មុនឈានដល់ការសម្រេចស៊ុតបាល់ ១១ម៉ែត្រកាត់សេចក្តីនេះ ក្រុមទាំងពីរបានឆ្លងកាត់ការប្រកួតពេញម៉ោងដ៏ស្វិតស្វាញ់ក្នុងលទ្ធផលស៊ុតគ្នាទៅមកបាន ២-២ នៅពហុកីឡដ្ឋានជាតិ(អូឡាំពិក) កាលពីយប់មិញ ដែលនេះជាជំនួបលើកទី២ ក្នុងការដណ្តើមពានបើករដូវកាលថ្មី រវាងក្រុមទាំងពីរ បានផ្ដល់នូវការប្រកួតប្រជែងក្នុងទម្រង់កម្រិតខ្ពស់ដ៏គួរឲ្យចាប់អារម្មណ៍ផងដែរ ។

ក្នុងវគ្គទី១ ព្រះខ័នរាជ បាននាំមុខ ១គ្រាប់មុន រកបានដោយកីឡាករចំណូលថ្មី Peprah Kwame នៅនាទី១៧ មុនពេលភ្នំពេញក្រោន វាយបកតាមស្មើ ១-១ មកវិញនៅនាទី៦៨ ដោយខ្សែប្រយុទ្ធចំណូលថ្មី Tellez Melendez Makerlo។ បន្ទាប់មកការបង្កើនទម្រង់លេងយ៉ាងស្វិតស្វាញទៅវិញទៅមក ក៏កាន់តែខ្លាំងរហូតនៅនាទីចុងម៉ោង Peprah Kwame ក៏បានបន្ថែមគ្រាប់ទី២ ជួយព្រះខ័នរាជស្វាយរៀង បើកការនាំមុខជាងថ្មីនៅនាទី៨៧ តែកីឡាករវ័យក្មេង សារ ទី ក៏រកបានគ្រាប់តាមស្មើឱ្យ ភ្នំពេញក្រោន នៅនាទី៩០+៣ ។

ក្រោយពីបញ្ចប់ការប្រកួតពេញម៉ោងស្មើគ្នា ២-២ នេះ ទៅតាមលក្ខខណ្ឌការប្រកួត គណៈកម្មការបានសម្រេចកាត់សេចក្ដីដោយការកាត់ទាត់បាល់ប៉េណាល់ទី ក្នុងនោះក្រុមជើងឯកលីគកំពូលកម្ពុជា ព្រះខ័នរាជស្វាយរៀង ដែលជាក្រុមផ្ដើមទាត់មុន បានស៊ុតបញ្ចប់ទីសម្រេច ៥គ្រាប់តែម្តង គ្រាដែលភ្នំពេញក្រោន ក្នុងនាមក្រុមជើងឯកពានសម្ដេចតេជោ ហ៊ុន សែន គឺស៊ុតបានតែ ៤ដង ជាមួយនឹងការស៊ុតបញ្ចប់ទីបានសម្រេចត្រឹម ៣គ្រាប់ ។

ខណៈការទាត់គ្រាប់បាល់លើកទី៤ របស់ សារ ទី ត្រូវបានរារាំងដោយអ្នកចាំទី វីរៈ ដារ៉ា ហើយតាមរយៈការស៊ុតនេះ ឃើញថាគ្រាប់បាល់របស់ក្រុមព្រះខ័នរាជស្វាយរៀង មានដល់ ៥គ្រាប់ ដែលនាំឱ្យពួកគេសម្រេចក្តីសម្រៃនៅការលើកពានបើករដូវកាល ២ឆ្នាំជាប់គ្នាតែម្តង។

ទន្ទឹមជាមួយជ័យជម្នះនេះ ព្រះខ័នរាជស្វាយរៀង បានទទួលពានអនុស្សាវរីយ៍ អមជាមួយប្រាក់រង្វាន់ ១២លានរៀល ប៉ុន្ដែភ្លាមៗតែម្តង ខណៈការលើកពានមិនបាន ១០នាទីផងនោះ ក្រុមមានមូលដ្ឋាននៅខេត្តស្វាយរៀងនេះ ក៏បានប្រកាសបរិច្ចាគប្រាក់រង្វាន់ទាំងអស់ ជូនដល់មូលនិធិគាំទ្រកងទ័ព និងជនភៀសសឹក ដ្បិតកាលពីថ្ងៃទី២៨ ខែកក្កដាកន្លងទៅ ក្លិបទើបបានបរិច្ចាគថវិកា ២០លានរៀល ដើម្បីទ្រទ្រង់កងទ័ព និងជនភៀសសឹក ដែលបានរងផលប៉ះពាល់ដោយសារការប៉ះទង្គិចប្រដាប់អាវុធនៅព្រំដែនកម្ពុជា ពីការឈ្លានពានរបស់ថៃ កាលពីថ្មីៗកន្លងទៅ។

ពេលនេះទាំងភ្នំពេញក្រោន និងព្រះខ័នរាជស្វាយរៀង បានឈ្នះពានបើករដូវកាលលីគកំពូលកម្ពុជា ចំនួន ២លើកស្មើគ្នាផងដែរ ហើយចាំមើលថា តើក្រុមព្រះខ័នរាជស្វាយរៀង នឹងអាចការពារតំណែងជើងឯក Cambodia Premier League បានជាលើកទី ៣ជាប់គ្នាដែរ រឺទេ ?

សូមបញ្ជាក់ផងថា ក្រោយបញ្ចប់ការប្រកួតពានរង្វាន់បើករដូវកាលថ្មីខាងលើនេះ សម្រាប់លីគកំពូលកម្ពុជា CPL ឆ្នាំ២០២៥/២៦ នឹងត្រូវចាប់ផ្ដើមការប្រកួតជាផ្លូវការនៅថ្ងៃទី០៩-១០ ខែសីហា ឆ្នាំ២០២៥ ចុងសប្ដាហ៍នេះ ដោយមានបេក្ខភាព ១១សមាគម/ក្លិបចូលរួមដដែល ៕