(អេក្វាឌ័រ)៖ ក្រុមបាល់ទាត់ស្ត្រីប្រេស៊ីល ពេលនេះបន្តលើកពានរង្វាន់ Women’s Copa America 2025 ក្រោយពីបានយកឈ្នះក្រុមនារីកូឡុំប៊ី ពីការសម្រេចការស៊ុតបាល់ទាត់ប៉េណាលទី ៥-៤ បន្ទាប់ពីលេងពេញម៉ោងស្មើគ្នា ៤-៤ នាំឱ្យពួកគេឈ្នពាននេះជាលើកទី៥ ជាបៗគ្នាក្នុងប្រវត្តិសាស្រ្តផងដែរ ។

នេះក៏ជាការឈ្នះពានប្រចាំតំបន់អាមេរិកឡាទីន របស់ស្ត្រីប្រេស៊ីល ជាលើកទី៩ ច្រើនជាងគេ គិតចាប់តាំងពីកម្មវិធីប្រកួតនេះផ្តើមរៀបចំដំបូងនៅឆ្នាំ១៩៩១ ដែលពួកគេលើកបាននៅទឹកដីរបស់ខ្លួន ហើយគិតពីពេលនោះមកមានតែក្រុមនារីអាហ្សង់ទីន បានឈ្នះមួយលើកផងែដែរ កាលឆ្នាំ២០០៣ ។

ជាមួយគ្នានេះ កីឡាការិនីប្រេស៊ីល Amanda Gutierres និងកីឡាការិនី Cladia Martinez របស់ប៉ារ៉ាហ្គាយ ឈរក្នុងនាមអ្នកស៊ុតបានច្រើនគ្រាប់ជាងគេដល់ទី ៦គ្រាប់ស្មើគ្នា ហើយក្រុមនារីកូឡុំប៊ី ដ្បិតរងជើងឯកពាននេះជាលើកទី៤ ក៏ពិតមែន តែកូនក្រុមឆ្នើមកីឡាការិនី Linda Caicedo ស៊ុតបាន ៤គ្រាប់ស្មើជាមួយ Oriana Altuve ។

ហើយចំណោម ៦ប្រកួតគិតចាប់តាំងពីការលេងសន្សំពិន្ទុក្នុងវគ្គចែកពូល រហូតដល់វគ្គផ្តាច់ព្រ័ត្រលើកពាននេះ ក្រុមនារីប្រេស៊ីល លេងមិនចាញ់នោះទេ ខណៈក្រុមនារីអាហ្សង់ទីន បានលេខ៣ ក្រោយយកឈ្នះនារីអ៊ុយរូហ្គាយ ៕