(បរទេស)៖ ក្រុមហ៊ុនផលិតរថយន្តអគ្គិសនីរបស់វៀតណាម VinFast បានបើកដំណើរការរោងចក្រផលិតរថយន្តដំបូងរបស់ខ្លួននៅភាគខាងត្បូងប្រទេសឥណ្ឌា នៅថ្ងៃចន្ទនេះ ដែលជាការបោះជំហានដ៏សំខាន់មួយក្នុងការពង្រីកខ្លួនចូលទៅក្នុងទីផ្សាររថយន្តធំជាងគេទីបីរបស់ពិភពលោក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន CNA នៅថ្ងៃទី០៤ ខែសីហា ឆ្នំា២០២៥។

លោក Pham Sanh Chau ដែលជានាយកប្រតិបត្តិ (CEO) ប្រចាំតំបន់អាស៊ីរបស់ក្រុមហ៊ុន VinFast បានប្រាប់ទីភ្នាក់ងារសារព័ត៌មាន Reuters ក្នុងអំឡុងពេលសម្ពោធរោងចក្រនៅទីក្រុងទុតិកុឌី (Thoothukudi) ថា ក្រុមហ៊ុន VinFast គ្រោងនឹងដាក់លក់រថយន្តរបស់ខ្លួននៅតាម showroom នៅចុងខែនេះ។

គួរជម្រាបថា កាលពីឆ្នាំមុន ក្រុមហ៊ុន VinFast និងរដ្ឋ Tamil Nadu បានព្រមព្រៀងគ្នាក្នុងការវិនិយោគរហូតដល់ ២ ពាន់លានដុល្លារ ដោយមានការប្តេជ្ញាចិត្តដំបូង ៥០០ លានដុល្លារសម្រាប់រយៈពេល ៥ ឆ្នាំដំបូង។ រោងចក្រនេះត្រូវបានរំពឹងថានឹងមានសមត្ថភាពផលិតរថយន្តបានរហូតដល់ ១៥០.០០០ គ្រឿងក្នុងមួយឆ្នាំ៕