(ភ្នំពេញ)៖ ក្រុមបាល់ទាត់នារីកម្ពុជា ២ឈុត នៅរសៀលថ្ងៃទី៤ ខែសីហានេះ បានធ្វើដំណើរចាកចេញពីមាតុភូមិដំណាលគ្នា ដើម្បីចូលរួមប្រកួតពានរង្វាន់អន្ដរជាតិរៀងៗខ្លួន រួមមានក្រុមជម្រើសជាតិនារីកម្ពុជា(ក្រុមធំ) ដែលត្រូវចូលរួមការប្រកួតជើងឯកអាស៊ីអាគ្នេយ៍ ឆ្នាំ២០២៥ (ASEAN MSIG Serenity Cup 2025) នៅប្រទេសវៀតណាម និងក្រុមជម្រើសជាតិនារីអាយុក្រោម ២០ឆ្នាំកម្ពុជា ចេញទៅប្រកួតជម្រុះជើងឯកអាស៊ីអាយុក្រោម ២០ឆ្នាំ(AFC U20 Women’s Asian Cup) ឆ្នាំ២០២៦ នៅប្រទេសចិន។

សម្រាប់ព្រឹត្តិការណ៍បាល់ទាត់នារីជើងឯកអាស៊ីអាគ្នេយ៍ ឆ្នាំ២០២២៥ នៅប្រទេសវៀតណាម នឹងចាប់ផ្ដើមការប្រកួតពីថ្ងៃទី៦-១៩ ខែសីហាខាងមុខ។ យុទ្ធនាការនេះ ក្រុមជម្រើសជាតិនារីកម្ពុជា ដឹកនាំដោយគ្រូបង្វឹកជនជាតិជប៉ុន លោក Koji Gyotoku ដោយស្ថិតក្នុងពូលA ជាមួយក្រុមម្ចាស់ផ្ទះវៀតណាម ឥណ្ឌូនេស៊ី និងថៃ ដើម្បីធ្វើការប្រកួតប្រជែងកៅអីវគ្គបន្ដ។ រីឯពូលB មាន ៤ក្រុមដូចគ្នា រួមមានក្រុមជម្រើសជាតិហ្វីលីពីន មីយ៉ាន់ម៉ា ទីម័រខាងកើត និងអូស្ដ្រាលី។

ចំណែកការប្រកួតជម្រុះបាល់ទាត់នារីជើងឯកទ្វីបអាស៊ីអាយុក្រោម ២០ឆ្នាំ ឆ្នាំ២០២៦ ដែលចិនធ្វើម្ចាស់ផ្ទះ នឹងត្រូវធ្វើការប្រកួតពីថ្ងៃទី៦-១០ ខែសីហាខាងមុខ។ បេសកកម្មនេះដែរ ក្រុមជម្រើសជាតិនារី U20 កម្ពុជា ដឹកនាំដោយគ្រូបង្វឹកលោក ខែក ខេមរិន្ទស្ថិតក្នុងពូលE ជាមួយក្រុមម្ចាស់ផ្ទះចិន លីបង់ និងស៊ីរី។ វគ្គជម្រុះនេះ បែងចែកជា ៨ពូល ដើម្បីស្វែងរកក្រុមកំពូលតារាង នៃពូលនីមួយៗ និងក្រុមលេខ២ ល្អជាងគេ ៣ក្រុម ឡើងទៅបង្គ្រប់កៅអីជុំផ្ដាច់ព្រ័ត្រ នាខែមេសា ឆ្នាំ២០២៦ ខាងមុខ៕