(ស្វាយរៀង)៖ សាកលវិទ្យាល័យស្វាយរៀង និងសហគ្រិនខ្មែរ នៅព្រឹកថ្ងៃទី៣ ខែសីហា ឆ្នាំ២០២៥ បានរៀបចំកម្មវិធី «ប្រកួតប្រជែងគំរូអាជីវកម្ម វគ្គផ្តាច់ព្រ័ត្រ របស់និស្សិតសាកលវិទ្យាល័យស្វាយរៀង» សម្រាប់រដូវកាលទី៣ ក្រោមអធិបតីភាព លោកសាស្រ្តាចារ្យ ទុំ សារាវុធ សាកលវិទ្យាធិការ នៃសាកលវិទ្យាល័យស្វាយរៀង និង កញ្ញា ក្រិច ស្រីនាង មន្រ្តីជំនាញនវានុវត្តន៍នៃសហគ្រិនខ្មែរតំណាង លោកបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាល ទទួលបន្ទុកជានាយកប្រតិបត្តិសហគ្រិនខ្មែរ ដែលមានក្រុមនិស្សិត ត្រូវចូលរួមប្រកួតផ្តាច់ព្រ័ត្រ ចំនួន ១១ក្រុម ជាក្រុមជម្រើសចុងក្រោយ។

ពិធីនេះមានការចូលរួមពី គណៈគ្រប់គ្រង លោកគ្រូ អ្នកគ្រូនៃសាកលវិទ្យាល័យស្វាយរៀង​ មានការចូលរួមជាភ្ញៀវកិត្តិយសពី​ មន្ទីរវិស័យជំនាញនានាជុំវិញខេត្ត តំណាងរដ្ឋបាលក្រុង/ស្រុកទាំង៨ វិស័យឯកជនមានក្រុមហ៊ុន ធនាគារ គ្រឹះស្ថានមីក្រូហិរញ្ញវត្ថុ និងម្ចាស់អាជីវកម្មផ្ទាល់ខ្លួន នាយកវិទ្យាល័យទាំង ២១ទូទាំងខេត្ត យុវជន សសយក យុវជនកាកបាទក្រហមកម្ពុជា យុវជនកាយរឹទ្ធិកម្ពុជា សិស្ស និស្សិត អតីតនិស្សិត និងមាតាបិតា សរុបប្រមាណ ៤៥០នាក់។

លោកបណ្ឌិត ឈៀង វណ្ណមុនិណ្ឌ ក៏បានផ្តាំផ្ញើដល់កម្មវិធីទាំងមូលផងដែរថា «ប្រព័ន្ធអេកូឡូស៊ីសហគ្រិនភាពដែលមានភាពរស់រវើក តែងតែមានការបង្កើតនវានវត្តន៍ថ្មី ថែមទាំនវានុវត្តន៍ដែលមានស្រាប់ ជំរុញនវានុវត្តន៍ដែលមានសក្តានុពល ដើម្បីទុកជាទុនសម្រាប់គំនិតច្នៃប្រឌិតថ្ងៃក្រោយ ដែលជាការអភិវឌ្ឍមូលធនមនុស្សស្របតាម យុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា» ។

លោកសាស្រ្តាចារ្យជំនួយ មុំ កេត ព្រឹទ្ធបុរសមហាវិទ្យាល័យគ្រប់គ្រងពាណិជ្ជកម្ម នៃសាកលវិទ្យាល័យ ស្វាយរៀង បានរាយការណ៍អំពីកិច្ចដំណើរការកម្មវិធី «ប្រកួតប្រជែងគំរូអាជីវកម្ម រដូវកាលទី៣» ឆ្នាំ២០២៥នេះ មានបេក្ខជនជា និស្សិត និងអតីតនិស្សិត ចុះឈ្មោះចូលរួមសរុបចំនួន ៦៨នាក់ នារី ៤១នាក់ (ស្មើនឹង ១៤ក្រុម) មកពីមហាវិទ្យាល័យទាំង៥ នៃសាកលវិទ្យាល័យស្វាយរៀង។

កម្មវិធីនេះ បានដំណើរការដោយឆ្លងកាត់ ៥ ដំណាក់កាលសំខាន់ៗ រួមមាន៖ ១. ការផ្សព្វផ្សាយ និងចុះឈ្មោះចូលរួម ២. បណ្តុះបណ្តាលអំពីសហគ្រិនភាព និងគំរូអាជីវកម្ម ៣. ការប្រកួតប្រជែងវគ្គពាក់កណ្តាលផ្តាច់ព្រ័ត្រ ៤. ការអភិវឌ្ឍន៍គំរូគំនិតអាជីវកម្ម និងគំរូផលិតផល (Product Prototype) និង ៥. ការប្រកួតប្រជែងផ្តាច់ព្រ័ត្រ ដែលនឹងត្រូវធ្វើក្នុងពេលនេះ។

លោកសាស្រ្តាចារ្យ ទុំ សារាវុធ បានសំណេះសំណាល និងផ្តោតទៅលើការលើកទឹកចិត្តឲ្យមានការចូលរួម និងការគាំទ្រចំពោះដៃគូអភិវឌ្ឍន៍ទាំងឡាយ ដើម្បីបង្កើតឲ្យមាន នូវការប្រកួតប្រជែងដំណាក់កាលជាបន្តបន្ទាប់ទៀត និងបានថ្លែងអំណរគុណដល់សហគ្រិនខ្មែរ ដែលបានផ្តល់ការគាំទ្រទាំងផ្នែកបច្ចេកទេស និងមូលនិធិ ដើម្បីដំណើរការសកម្មភាពនេះទៅបាន។ ឈានមកដល់ដំណាក់កាលប្រកួតផ្តាច់ព្រ័ត្រ ក្រុមនិស្សិតគឺទទួលបានជោគជ័យរួចហើយ គឺការជោគជ័យលើគំនិតផ្តួចផ្តើម លើរបៀបនៃការធ្វើការជាក្រុម វិន័យការងារ ការតស៊ូព្យាយាមគ្រប់ដំណាក់កាល ជាពិសេសលើការប្តេជ្ញាចិត្តលើកិច្ចការនេះ។

លោកសាស្រ្តាចារ្យ ក៏បានលើកឡើងគាំទ្រទៅលើការវាយតម្លៃ និងផ្តល់ពិន្ទុរបស់គណៈកម្មការ និងថ្លែងអំណរគុណដល់ភ្ញៀវកិត្តិយសពីគ្រប់អង្គភាព ស្ថាប័ន និងវិស័យឯកជន ដែលបានអញ្ជើញចូលរួម និងផ្តល់ជាគំនិត ជំរុញលើកទឹកចិត្តដល់និស្សិត និងយុវជន ក្នុងការចាប់ផ្តើមអាជីវកម្ម និងជាឱកាសដើម្បីទទួលបានមូលនិធិដើមទុន ដើម្បីឲ្យនិស្សិត និងអ្នកស្រាវជ្រាវ ខិតខំសិក្សាស្រាវជ្រាវបង្កើតគំនិតថ្មីចូលរួមចំណែកកំណើនសេដ្ឋកិច្ច។

ជាមួយគ្នានេះ លោកសាស្រ្តចារ្យ បានលើកពីគម្រូអ្នកជោគជ័យមួយចំនួនដូចជាម្ចាស់ Facebook, ម្ចាស់ App ញាំ២៤ ដែលបង្កើតឡើងដោយកូនខ្មែរ ត្រូវបានទិញដោយក្រុមហ៊ុន Grab ល និងបានណែនាំដល់គ្រប់មហាវិទ្យាល័យទាំងអស់ ឲ្យបន្តផ្តួចផ្តើមនូវកម្មវិធីប្រកួតប្រជែងនេះជាបន្តបន្ទាប់ទៀត៕