(បរទេស)៖ ក្រុមហ៊ុន China Mobile ដែលជាក្រុមហ៊ុនទូរគមនាគមន៍ឥតខ្សែដ៏ធំបំផុតរបស់ពិភពលោក បានប្រកាសថា ខ្លួនបានទិញភាគហ៊ុនចំនួន ១៤,៤% នៅក្នុងក្រុមហ៊ុន HKBN ដែលជាក្រុមហ៊ុនផ្តល់សេវាអ៊ីនធឺណិតដ៏ធំមួយនៅហុងកុង។ កិច្ចព្រមព្រៀងនេះមានតម្លៃសរុប ១,០៨ ពាន់លានដុល្លារហុងកុង (ប្រហែល ១៣៧,៥៨ លានដុល្លារ)។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៤ ខែសីហា ឆ្នាំ២០២៥។

ការទិញភាគហ៊ុនលើកនេះ បានធ្វើឱ្យ China Mobile កើនចំណែកកាន់កាប់នៅក្នុងក្រុមហ៊ុន HKBN ដល់ជិត ៣០%។ គួររំលឹកផងដែរថា China Mobile បានចាប់អារម្មណ៍ទិញភាគហ៊ុន HKBN អស់រយៈពេលជិតពីរឆ្នាំមកហើយ។

តាមរយៈកិច្ចព្រមព្រៀងនេះ ក្រុមហ៊ុន China Mobile Hong Kong (CMHK) ដែលជាក្រុមហ៊ុនបុត្រសម្ព័ន្ធរបស់ China Mobile បានទិញភាគហ៊ុន ២១៣,៦ លានភាគហ៊ុន ពីក្រុមហ៊ុន Twin Holding ក្នុងតម្លៃ ៥,០៧៥ ដុល្លារហុងកុងក្នុងមួយភាគហ៊ុន។ ពីមុនមក Twin Holding កាន់កាប់ភាគហ៊ុនប្រមាណ ១៥,៤៦% របស់ HKBN ប៉ុន្តែបន្ទាប់ពីលក់ភាគហ៊ុនមួយផ្នែកទៅឱ្យ China Mobile ឥឡូវនេះ Twin Holding នៅសល់ភាគហ៊ុនតែ ១,០២% ប៉ុណ្ណោះ៕