(បរទេស)៖ នៅថ្ងៃទី០៤ ខែសីហា ឆ្នាំ២០២៥ ក្រុមប្រឹក្សាភិបាលរបស់ក្រុមហ៊ុនរថយន្តអគ្គិសនី Tesla បានអនុម័តឲ្យផ្តល់ភាគហ៊ុន ៩៦លានឯកតា ដល់នាយកប្រតិបត្តិ Elon Musk ដែលគិតជាទឹកប្រាក់មានតម្លៃប្រហែល ២៩ពាន់លានដុល្លារ។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី០៥ ខែសីហា ឆ្នាំ២០២៥។

ការផ្តល់ភាគហ៊ុននេះត្រូវបានគេហៅថាជា «ប្រាក់រង្វាន់បណ្ដោះអាសន្ន» ដើម្បីរក្សាភាពសកម្ម និងការចូលរួមរបស់ Elon Musk នៅក្នុងក្រុមហ៊ុន Tesla ខណៈក្រុមហ៊ុនកំពុងផ្លាស់ប្តូរទិសដៅទៅកាន់ផ្នែករថយន្តតាក់ស៉ី (robotaxi) និង រ៉ូបូតឆ្លាតវៃ (AI humanoid robots)។ ការផ្តល់ឲ្យ Elon Musk នៅពេលនេះ​គឺ ដើម្បីរក្សាការចូលរួមរបស់ Elon Musk ជាមួយ Tesla ។ Elon Musk ត្រូវតែបន្តនៅជាអគ្គនាយករយៈពេល ២ឆ្នាំ ហើយកាន់ភាគហ៊ុននេះរយៈពេល ៥ឆ្នាំ។ ភាគហ៊ុនរបស់ Musk នឹងកើនឡើងពីប្រហែល ១៣% ទៅជាង ១៥% ដែលអាចបង្កើនឥទ្ធិពលរបស់លោកក្នុងក្រុមហ៊ុនកាន់តែខ្លាំង។ ងាកមកតម្លៃភាគហ៊ុនរបស់ Tesla បានកើនឡើងប្រហែល ២–៣% បន្ទាប់ពីការប្រកាសនោះ។ អ្នកវិនិយោគមួយចំនួនមើលឃើញថា នេះជាសញ្ញាល្អក្នុងការរក្សាប្រសិទ្ធភាព ភាពជាអ្នកដឹកនាំរបស់ Musk។

ទោះបីជាយ៉ាងណាក៏ដោយ អ្នកជំនាញច្បាប់ និងអ្នកវិភាគផ្នែកគ្រប់គ្រងក្រុមហ៊ុនមួយចំនួនបានសម្ដែងការព្រួយបារម្ភថា ការផ្តល់ប្រាក់រង្វាន់ថ្មីនេះប្រហែលជា ការបញ្ជូនមកវិញនៃផែនការមុនដែលត្រូវបានតុលាការបដិសេធរួចមក។ តាមទស្សនៈវិស័យពាណិជ្ជកម្មចំពោះ Elon Musk គឺថា លោកនឹងបន្តដឹកនាំ Tesla រហូតដល់ឆ្នាំ២០២៧ ឬលើសពីនេះ ប្រសិនបើគម្រោងនានាសម្រេចទៅតាមផែនការ៕