(បរទេស)៖ ក្រុមហ៊ុនផលិតរថយន្តយក្សរបស់ជប៉ុន Toyota និង Honda ត្រូវបានគេរំពឹងថានឹងប្រកាសពីការធ្លាក់ចុះប្រាក់ចំណេញនៅក្នុងត្រីមាសទីមួយនេះ។ មូលហេតុចម្បងគឺដោយសារការដំឡើងពន្ធនាំចូលរបស់សហរដ្ឋអាមេរិក និងការឡើងថ្លៃនៃប្រាក់យ៉េន ដែលធ្វើឱ្យចំណាយកើនឡើង ទោះបីជាមានតម្រូវការរថយន្តកូនកាត់ (hybrids) ខ្ពស់ក៏ដោយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៥ ខែសីហា ឆ្នាំ២០២៥។

យោងតាមការព្យាករណ៍ជាមធ្យមរបស់ក្រុមអ្នកវិភាគចំនួន ៧នាក់ដែលបានស្ទង់មតិដោយ LSEG ក្រុមហ៊ុន Toyota ដែលជាក្រុមហ៊ុនលក់រថយន្តបានច្រើនជាងគេបំផុតលើពិភពលោកត្រូវបានព្យាករណ៍ថានឹងប្រកាសពីការធ្លាក់ចុះប្រាក់ចំណេញប្រតិបត្តិការ ៣១% ធៀបនឹងរយៈពេលដូចគ្នាកាលពីឆ្នាំមុន មកនៅត្រឹម ៩០២ ពាន់លានយ៉េន (ប្រហែល ៦.១៤ ពាន់លានដុល្លារ) នៅថ្ងៃព្រហស្បតិ៍។ នេះជាលទ្ធផលប្រចាំត្រីមាសខ្សោយបំផុតរបស់ក្រុមហ៊ុន​ក្នុងរយៈពេលជាង ២ឆ្នាំកន្លងទៅ។

រីឯក្រុមហ៊ុន Honda ត្រូវបានគេរំពឹងថានឹងប្រកាសពីការធ្លាក់ចុះប្រាក់ចំណេញប្រតិបត្តិការ ៣៦% មកនៅត្រឹម ៣១១.៧ ពាន់លានយ៉េននៅថ្ងៃពុធ ដែលជាការធ្លាក់ចុះប្រចាំត្រីមាសជាប់គ្នាលើកទីពីរ។ ក្រុមហ៊ុនផលិតរថយន្តមួយនេះបានព្យាករណ៍រួចហើយពីការធ្លាក់ចុះប្រាក់ចំណេញប្រមាណ ៥៩% សម្រាប់ពេញមួយឆ្នាំ។

គួរជម្រាបថា ក្រុមហ៊ុនទាំងពីរអាចនឹងត្រូវប្រឈមមុខនឹងពន្ធ ១៥% លើការនាំចូលរថយន្តជប៉ុនចូលទៅក្នុងសហរដ្ឋអាមេរិក ដែលកាលពីមុនពន្ធសរុបមាន ២៧.៥% បន្ទាប់ពីកិច្ចព្រមព្រៀងពាណិជ្ជកម្មទ្វេភាគីកាលពីខែមុន។ ទោះបីជាយ៉ាងណាក៏ដោយ អ្នកវិភាគបានលើកឡើងថា ស្ថានការណ៍អាចនឹងប្រសើរឡើងវិញនៅពេលក្រោយ ដោយសារតែការបន្ថយពន្ធគយមួយចំនួន។ ក្រុមហ៊ុនទាំងពីរក៏កំពុងរិះរកវិធានការណ៍ដើម្បីដោះស្រាយបញ្ហាទាំងនេះផងដែរ៕