(ភ្នំពេញ)៖ ក្រុមហ៊ុនខេមបូឌានព្រីមៀរលីគ(CPL) បានដាក់បង្ហាញនូវកម្មវិធី CPL Play ដែលជាបទពិសោធន៍ថ្មីសម្រាប់លីគកំពូលកម្ពុជា ដើម្បីទាក់ទាញអ្នកគាំទ្រកាន់តែច្រើន ជាមួយបណ្ដាសមាគម/ក្លិបសមាជិក និងគ្រប់ភាគីពាក់ព័ន្ធ ក្នុងគោលបំណងជំរុញភាពរីកចម្រើន និងកាន់តែប្រសើរឡើង នៃវិស័យកីឡាបាល់ទាត់កម្ពុជា។

នេះបើតាមការលើកឡើងរបស់លោក Peter Koo នាយកគ្រប់គ្រង CPL ក្នុងកម្មវិធីចុះហត្ថលេខាលើអនុស្សរណៈនៃការយោគយល់គ្នា និងការដាក់បង្ហាញកម្មវិធី CPL PLAY រវាងក្រុមហ៊ុនខេមបូឌានព្រីមៀរលីគ និងក្រុមហ៊ុន StadiumX នៅថ្ងៃទី៥ ខែសីហា ឆ្នាំ២០២៥ មុនលីគកំពូលកម្ពុជា ចាប់ផ្ដើមការប្រកួតរដូវកាលថ្មី នាចុងសប្ដាហ៍នេះ។

លោក Peter Koo បានបញ្ជាក់ថា នេះគឺជាកម្មវិធីថ្មី និងបទពិសោធន៍ថ្មី សម្រាប់វិស័យបាល់ទាត់កម្ពុជា ក្នុងការប្រើប្រាស់បច្ចេកវិទ្យាទាក់ទាញអ្នកគាំទ្រ(Fan) ដ្បិតកន្លងមកធ្លាប់តែមាននៅលីគអាមេរិក អង់គ្លេស និងបណ្ដាលីគធំៗនៅអឺរ៉ុប ។ ដូច្នេះនេះជាលើកដំបូង CPL បានប្រើប្រាស់នូវប្រព័ន្ធឌីជីថល សម្រាប់ផ្ដល់នូវទំនាក់ទំនង និងអត្ថប្រយោជន៍ជាច្រើនដល់អ្នកគាំទ្រ ក៏ដូចជាភាគីពាក់ព័ន្ធ។

លោកបន្ដថា CPL Play មានកម្មវិធីជាដំណាក់ ដែលអ្នកគាំទ្រអាចចូលរួមបាន ចាប់ពីការទិញកាត Player Cards ពោលគឺជាកាតកីឡាករតំណាងក្លិបនីមួយៗ ដែលជ្រើសរើសដោយក្លិបនីមួយៗ រៀងរាល់សប្ដាហ៍ ។ បន្ទាប់មកអ្នកគាំទ្រនឹងទទួលបាននូវ CPL Stars សម្រាប់ប្រើប្រាស់ជាប្រយោជន៍ផ្សេងៗ ដូចជាការចាប់ឆ្នោត ដើម្បីឈ្នះរង្វាន់ទូរស័ព្ទទំនើបៗរៀងរាល់សប្ដាហ៍ទៀតផង។

ការបង្កើតនូវកម្មវិធីខាងលើ ដើម្បីឆ្លើយតបនឹងសន្ទុះអ្នកគាំទ្រក្លិប និងលីគជារៀងរាល់ឆ្នាំ ក៏ដូចជាចូលរួមជាមួយក្លិប ដែលខិតខំពង្រឹង និងចំណាយធនធានជាច្រើន ដើម្បីការប្រកួតប្រជែងដ៏ទាក់ទាញលើទីលាន។ ដូច្នេះការចាប់ផ្ដើមនូវបទពិសោធន៍ថ្មីនេះ លោកសង្ឃឹមថា នឹងទទួលបានការគាំទ្រ និងចូលរួមច្រើនពីអ្នកគាំទ្រ ដើម្បីជំរុញឲ្យមានភាពទាក់ទាញ និងជំរុញលីគកំពូលកម្ពុជាកាន់តែរីកចម្រើន ហើយកាន់តែល្អប្រសើរបន្ថែមទៀត។

ជាមួយគ្នាលោក ធុល រិទ្ធី តំណាង StadiumX ដែលចូលរួមជំរុញឲ្យលេចចេញនូវកម្មវិធីថ្មីខាងលើ បានគូសបញ្ជាក់ថា ការចាប់ផ្ដើមដំបូងនូវកម្មវិធី CPL Play លោកមិនរំពឹងជោគជ័យ ១០០% នោះទេ តែជាការសាកល្បង ដើម្បីផ្ដល់ឲ្យអ្នកគាំទ្រកាន់តែមានភាពច្បាស់លាស់ក្នុងការតាមដាន និងគាំទ្រវិស័យកីឡាបាល់ទាត់ជាតិ តាមរយៈការការចូលរួមចំណែកវាយតម្លៃផ្ទាល់ រវាងកីឡាករក្លិបនីមួយៗ។ លោកសង្ឃឹមថា នឹងអាចរៀនសូត្រច្រើនជាមួយជំហានថ្មីនេះ ដើម្បីឆ្ពោះទៅរកភាពជោគជ័យនាថ្ងៃអនាគត៕