(បរទេស)៖ បណ្ដាញអ៊ីនធឺណិតដែលគ្រប់គ្រងដោយរដ្ឋាភិបាលអូស្ត្រាលី NBN Co ថ្មីៗនេះបានចុះកិច្ចសន្យាជាមួយក្រុមហ៊ុន Amazon ដើម្បីផ្ដល់សេវាកម្មអ៊ីនធឺណិតតាមរយៈផ្កាយរណប ជំនួសឲ្យក្រុមហ៊ុន Starlink របស់លោក Elon Musk។ កិច្ចសន្យានេះនឹងអនុញ្ញាតឲ្យក្រុមហ៊ុន Amazon ប្រើប្រាស់ផ្កាយរណបគន្លងទាប Project Kuiper របស់ខ្លួន ដើម្បីផ្ដល់សេវាអ៊ីនធឺណិតល្បឿនលឿនតាមផ្ទះ និងអាជីវកម្មប្រមាណ ៣០០,០០០ កន្លែងដែលបណ្ដាញអ៊ីនធឺណិតលើដីមិនអាចទៅដល់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៥ ខែសីហា ឆ្នាំ២០២៥។

សេវាកម្មផ្កាយរណបនេះ នឹងចាប់ផ្ដើមដាក់ឲ្យដំណើរការនៅឆ្នាំក្រោយ ដើម្បីជំនួសផ្កាយរណបចំនួនពីររបស់រដ្ឋាភិបាលដែលគ្រោងនឹងចូលនិវត្តន៍នាឆ្នាំ ២០៣២។ ការសម្រេចចិត្តនេះត្រូវបានចាត់ទុកថាជាការបាត់បង់ឱកាសដ៏ធំសម្រាប់ក្រុមហ៊ុន Starlink ដែលបច្ចុប្បន្នជាក្រុមហ៊ុនផ្ដល់សេវាអ៊ីនធឺណិតផ្កាយរណបដ៏ធំបំផុតនៅលើពិភពលោក និងមានអតិថិជនជាង ២៥០,០០០ នាក់រួចមកហើយនៅអូស្ត្រាលី។ បច្ចុប្បន្ន Starlink មានផ្កាយរណបចំនួន ៨,០០០ គ្រឿង ខណៈ Amazon ទើបតែមាន ៧៨ គ្រឿងប៉ុណ្ណោះ។ ទោះបីជាយ៉ាងនេះក្ដី លោក Gavin Williams ប្រធានផ្នែកអភិវឌ្ឍន៍សម្រាប់សេវាកម្មនៅតំបន់ដាច់ស្រយាលរបស់ NBN បានបញ្ជាក់ថា ពួកគេមានទំនុកចិត្តយ៉ាងពេញទំហឹងលើការវិនិយោគប្រហែល ១៥ ពាន់លានដុល្លាររបស់ Amazon ទៅក្នុង Project Kuiper។

លោក Williams បានបន្ថែមថា ការជ្រើសរើសនេះត្រូវបានធ្វើឡើងបន្ទាប់ពីដំណើរការដេញថ្លៃយ៉ាងម៉ត់ចត់ ដែលផ្អែកលើកត្តាបច្ចេកទេស ប្រតិបត្តិការ និងពាណិជ្ជកម្ម។ ទោះបីជា Starlink មានវត្តមានដ៏រឹងមាំនៅអូស្ត្រាលីរួចហើយក៏ដោយ ក៏ NBN Co បានសម្រេចចិត្តធ្វើការជាមួយ Amazon ដែលបានសន្យាថានឹងផ្ដល់សេវាកម្មប្រកបដោយប្រសិទ្ធភាព និងភាពជឿជាក់ខ្ពស់នាពេលអនាគត៕