(ភ្នំពេញ)៖ ធនាគារ ព្រីនស៍ មានកិត្តិយសក្នុងការប្រកាសទទួលបានពានរង្វាន់ជា ធនាគារល្អបំផុតសម្រាប់សហគ្រាសធុនតូច និងមធ្យមនៅកម្ពុជា ពីស្ថាប័ន Euromoney ដែលជាសារព័ត៌មានហិរញ្ញវត្ថុអន្តរជាតិដ៏ល្បី ក្នុងរយៈពេល២ឆ្នាំជាប់ៗគ្នា ២០២៤ និង ២០២៥។

ការទទួលបានពានរង្វាន់នេះកើតឡើង ក្នុងឱកាសដ៏ពិសេសនៃខួបគម្រប់១០ឆ្នាំរបស់ធនាគារ ក្រោមប្រធានបទ មួយទស្សវត្សនៃការលះបង់ ដែលជាការបង្ហាញការតាំងចិត្ត ឥតងាករេរបស់ធនាគារក្នុងការជំរុញ និងគាំទ្រការរីកលូតលាស់របស់វិស័យសហគ្រាសធុនតូច និងមធ្យមនៅប្រទេសកម្ពុជា។

សមិទ្ធផលនេះ មិនមែនត្រឹមជាពានរង្វាន់នោះទេ តែជាសក្ខីភាពនៃភាពជាអ្នកដឹកនាំរបស់ធនាគារ ព្រីនស៍ ក្នុងការផ្តល់នូវដំណោះស្រាយហិរញ្ញវត្ថុ ប្រកបដោយភាពច្នៃប្រឌិត និងសមស្រប និងមានការចូលរួមយ៉ាងទូលំទូលាយ ដែលអាចឆ្លើយតបទៅនឹងតម្រូវការសហគ្រាសធុនតូច និងមធ្យមនៅក្នុងប្រទេសកម្ពុជា។

លោក Looi Kok Soon ប្រធាននាយកប្រតិបត្តិនៃធនាគារ ព្រីនស៍ បានថ្លែងថា «ភាពជោគជ័យជាបន្តបន្ទាប់របស់យើង គឺជាសក្ខីភាពដ៏មានន័យ ដែលបានបង្ហាញពីការយកចិត្តទុកដាក់ យ៉ាងខ្លាំងរបស់យើងចំពោះការគាំទ្រដល់សហគ្រាសធុនតូច និងមធ្យមទូទាំងប្រទេសកម្ពុជា។ ជារៀងរាល់ថ្ងៃ យើងតែងខិតខំយ៉ាងក្លៀវក្លាក្នុងការផ្ដល់នូវជំនួយ និងធនធានសំខាន់ៗ ទៅតាមតម្រូវការអាជីវកម្ម ដើម្បីជំរុញឱ្យមានការអភិវឌ្ឍ និងភាពរីកចម្រើន។ ការទទួលស្គាល់ដ៏មានតម្លៃនេះ គឺជាកម្លាំងចលករដ៏សំខាន់មួយ ក្នុងការជួយជំរុញឱ្យយើងបន្តបេសកកម្ម ដើម្បីលើកស្ទួយស្មារតីសហគ្រិនភាពនៅក្នុងសហគមន៍របស់យើង»។

ការឈ្នះពានរង្វាន់ពីរឆ្នាំជាប់ៗគ្នារបស់ធនាគារ ព្រីនស៍ បានបង្ហាញឱ្យឃើញពីការប្តេជ្ញាចិត្តដ៏រឹងមាំ ក្នុងការផ្តល់នូវសេវាធនាគារប្រកបដោយគុណភាព និងនវានុវត្តន៍។ ធនាគារបានផ្តល់នូវដំណោះស្រាយហិរញ្ញវត្ថុដែលសមស្របបំផុត ចាប់តាំងពីកម្មវិធីទូរសព្ទដែលទទួលបានការវាយតម្លៃខ្ពស់ រហូតដល់សេវាកម្មធនាគារសម្រាប់អាជីវករកម្ពុជា និងសេវាកម្មធនាគារឌីជីថលដ៏ល្អឥតខ្ចោះផងដែរ។ ផលិតផលទាំងអស់នេះ ត្រូវបានរចនាឡើងក្នុងគោលបំណង នូវបង្កើតបរិយាកាសអាជីវកម្មដែលប្រសើរបំផុត សម្រាប់សហគ្រាសធុនតូច និងមធ្យមក្នុងសហគមន៍។

ក្នុងរយៈពេលដប់ឆ្នាំកន្លងមកនេះ ធនាគារ ព្រីនស៍ បានវិវត្តន៍ខ្លួនក្លាយជាដៃគូហិរញ្ញវត្ថុមួយដែលអាចជឿទុកចិត្តបាន សម្រាប់អាជីវកម្មក្នុងស្រុករាប់ពាន់កន្លែង តាមរយៈកម្មវិធីផ្តល់ប្រាក់កម្ចីដែលមានភាពបត់បែន ជម្រើសហិរញ្ញប្បទានពាណិជ្ជកម្ម និងសេវាឌីជីថលទំនើប ដែលត្រូវបានរចនាឡើងជាមួយល្បឿន ប្រព័ន្ធសុវត្ថិភាព និងប្រសិទ្ធភាពខ្ពស់។

ពានរង្វាន់ឆ្នាំនេះកាន់តែពិសេស ព្រោះយើងបានទទួលវានៅក្នុងឱកាសខួបគម្រប់ ១០ ឆ្នាំរបស់ធនាគារ ព្រីនស៍ និងបានប្រារព្ធព្រឹត្តិការណ៍ដ៏អស្ចារ្យគឺ ភូមិអាជីវករឆ្លាត ៧១៨ យ៉ាងជោគជ័យផងដែរ។

ភូមិអាជីវករឆ្លាត ៧១៨ បានប្រមូលផ្តុំអាជីវកររាប់រយនាក់ ដែលវាបានបង្ហាញពីស្មារតីសហគ្រិនភាព សារៈសំខាន់នៃការគ្រប់គ្រងហិរញ្ញវត្ថុយ៉ាងឈ្លាសវៃ និងអត្ថប្រយោជន៍ នៃដំណោះស្រាយទូទាត់តាមប្រព័ន្ធឌីជីថល ជាពិសេសតាមរយៈ PRINCE KHQR ដែលប្រកបដោយភាពច្នៃប្រឌិតរបស់ធនាគារ។ ព្រឹត្តិការណ៍នេះ បានបង្ហាញយ៉ាងច្បាស់ ពីការប្តេជ្ញាចិត្តរបស់ធនាគារ ក្នុងការគាំទ្រដល់អាជីវករគ្រប់រូបតាមរយៈគណនីអាជីវករឆ្លាត និងសមត្ថភាពប្រតិបត្តិការដ៏មានប្រសិទ្ធភាពរបស់កម្មវិធី PRINCE Merchant។

ការឆ្លុះបញ្ចាំងពីសារៈសំខាន់ នៃសមិទ្ធផលដ៏ល្អឥតខ្ចោះនេះ លោក Looi Kok Soon បានបញ្ជាក់ថា ការឈ្នះពានរង្វាន់ Euromoney ពីរឆ្នាំជាប់ៗគ្នា គឺជាការទទួលស្គាល់ដ៏ល្អ និងជាការលើកទឹកចិត្តដ៏ខ្លាំង។ វាបង្ហាញពីទំនុកចិត្តរបស់អតិថិជនសហគ្រាសធុនតូច និងមធ្យមមកលើសេវាកម្មរបស់យើង និងលើកទឹកចិត្តឱ្យយើងបន្តថែរក្សាទំនាក់ទំនង ដៃគូរយៈពេលវែង ដើម្បីឱ្យអាជីវកម្មនៅកម្ពុជាកាន់តែមានការរីកចម្រើន។

ខណៈពេលដែលយើងកំពុងប្រារព្ធខួបគម្រប់ ១០ ឆ្នាំ យើងនៅតែបន្តខិតខំលះបង់ ដើម្បីជំរុញការវិនិយោគក្នុងភាពច្នៃប្រឌិត ការផ្លាស់ប្តូរឌីជីថល និងបរិយាបន្នហិរញ្ញវត្ថុ។
កញ្ចប់សេវាកម្មសម្រាប់សហគ្រាសធុនតូច និងមធ្យមរបស់ធនាគារ ព្រីនស៍ ពិតជាលក្ខណៈទូលំទូលាយ បត់បែនបាន និងប្រកបដោយវិជ្ជាជីវៈ ដែលរួមបញ្ចូលដូចជា ឥណទានអាជីវកម្ម ឥណទានវិបារូបន៍ ហិរញ្ញប្បទានពាណិជ្ជកម្ម និងសេវាកម្មផ្សេងៗទៀតជាច្រើន។

សេវាកម្មទាំងនេះ ត្រូវបានរចនាឡើងដើម្បីគាំទ្រដល់កំណើន និងភាពធន់នៃឧស្សាហកម្មសហគ្រាសធុនតូចនិងមធ្យម ដែលកំពុងរីកដុះដាលនៅកម្ពុជា។
ស្របពេលដែលធនាគារ ព្រីនស៍ កំពុងចាប់ផ្តើមដំណើរឆ្ពោះទៅកាន់ជំពូកបន្ទាប់របស់ខ្លួន យើងនៅតែប្រកាន់ខ្ជាប់នូវបេសកកម្មរបស់ខ្លួន ក្នុងការផ្តល់សិទិ្ធអំណាចដល់សហគ្រាសធុនតូច និងមធ្យម និងពង្រឹងឆ្អឹងខ្នងនៃសេដ្ឋកិច្ចកម្ពុជា៕