(បរទេស)៖ នាយកប្រតិបត្តិក្រុមហ៊ុន Meta លោក Mark Zuckerberg ត្រូវបានរាយកាណ៍មកថា ទ្រព្យសម្បត្តិបានកើនឡើង ២៦.៨ពាន់លានដុល្លារថែមទៀត ក្នុងរយៈពេលមួយថ្ងៃប៉ុណ្ណោះ។ ការកើនឡើងច្រើនក្នុងរយៈពេលដ៏ខ្លីនេះ បន្ទាប់ពីតម្លៃភាគហ៊ុនរបស់ក្រុមហ៊ុន Meta កើនឡើងយ៉ាងខ្លាំង ពោលរហូតដល់ប្រមាណ ២២% បើធៀបនឹងឆ្នាំមុន។ នេះបើតាមការចេញផ្សាយដោយសារព័ត៌មាន Bloomberg។

សន្ទុះនៃតម្លៃភាគហ៊ុនរបស់ Meta គឺគិតពីថ្ងៃទី៣១ ខែកក្កដា ដល់ថ្ងៃទី០១ ខែសីហា ឆ្នាំ២០២៥ ដែលធ្វើឲ្យវាក្លាយជាការកើនឡើងដ៏ច្រើនក្នុងប្រវត្តិសាស្ត្រ។ Mark Zuckerberg បានក្លាយជាបុរសដែលទទួលបានប្រាក់ចំណេញច្រើនជាងគេក្នុងរយៈពេលត្រឹមមួយថ្ងៃ ក្នុងឆ្នាំ២០២៥ ដោយសារតម្លៃភាគហ៊ុន Meta ឡើងលឿនខ្លាំង បន្ទាប់ពីលទ្ធផលហិរញ្ញវត្ថុល្អបំផុតក្នុងត្រីមាសទី២។ ការចំណាយលើបច្ចេកវិទ្យា AI ក៏ជាមូលហេតុទាក់ទាញអ្នកវិនិយោគ និងជួយឲ្យតម្លៃក្រុមហ៊ុន និងទ្រព្យសម្បត្តិរបស់លោកកើនឡើងគួរឱ្យចាប់អារម្មណ៍។ តម្លៃភាគហ៊ុនរបស់ Meta បានកើនឡើងជាង២០ភាគរយនេះ បន្ទាប់ពីក្រុមហ៊ុនប្រកាសប្រាក់ចំណូលប្រចាំត្រីមាសខ្ពស់ជាងការរំពឹងទុក និងបានប៉ាន់ស្មានការលូតលាស់នៃផ្សព្វផ្សាយពាណិជ្ជកម្ម (ad growth) យ៉ាងរឹងមាំ នៅលើ Facebook, Instagram និង WhatsApp។ វិនិយោគិនក៏បានជឿទុកចិត្តលើយុទ្ធសាស្ត្ររយៈពេលវែងរបស់ Mark Zuckerberg ដូចជាការអភិវឌ្ឍ metaverse និងការរួមបញ្ចូលបញ្ញាសិប្បនិម្មិត (AI) ទៅក្នុងវេទិការបស់ Meta ផងដែរ។

យោងតាម Bloomberg Billionaires Index ទ្រព្យសម្បត្តិសរុបរបស់ Mark Zuckerberg ទទួលបានគឺបានលើស ១៧០ ពាន់លានដុល្លារ បន្ទាប់ពីការកើនឡើងនេះ ហើយធ្វើឲ្យលោកឈរនៅក្នុងចំណោមមនុស្ស៥នាក់ មានទ្រព្យសម្បត្តិច្រើនបំផុតនៅលើពិភពលោក។ ការកើនឡើងយ៉ាងរហ័សនេះជាភស្តុតាងបន្ថែមថា មហាសេដ្ឋីក្នុងវិស័យបច្ចេកវិទ្យារូបនេះ អាចចំណេញឬខាតប្រាក់ពាន់លានដុល្លារក្នុងរយៈពេលខ្លី ដោយសារការប្រែប្រួលតម្លៃភាគហ៊ុនក្នុងទីផ្សារ៕