(បរទេស)៖​ មនុស្សពីរនាក់ដែលជាជនជាតិចិន ស្ថិតនៅក្នុងរដ្ឋកាលីហ្វ័រញ៉ា ត្រូវបានសមត្ថកិច្ចសហរដ្ឋអាមេរិកចាប់ខ្លួន និងចោទប្រកាន់ពីបទនាំចេញឈីបបច្ចេកវិទ្យា AI កម្រិតខ្ពស់របស់ក្រុមហ៊ុន Nvidia ទៅប្រទេសចិនដោយគ្មានអាជ្ញាប័ណ្ណ។​ នេះបេីតាមការចេញផ្សាយដោយសារព័ត៌មាន​ Reuters នៅថ្ងៃទី​០៦​ ខែសីហា​ ឆ្នាំ២០២៥។

អ្នកត្រូវចោទ​ ឈ្មោះ​ Geng Chuan អាយុ ២៨ឆ្នាំ​ រស់នៅទីក្រុង Pasadena​ និងម្នាក់ទៀត​ ឈ្មោះ​ Yang Shiwei អាយុ ២៨ឆ្នាំ​ រស់នៅ El Monte។ ក្រុមហ៊ុនដែលពាក់ព័ន្ធគឺ​ ALX Solutions Inc. ដែលបង្កើតឡើងនៅឆ្នាំ ២០២២។ ក្រុមហ៊ុននេះត្រូវបានគេហៅថា​ ជាភ្នាក់ងារបង្កប់សម្រាប់បញ្ជូនឈីប Nvidia ដល់ប្រទេសចិនតាមរយៈប្រទេសទីបី។​ អ្នកទាំងពីរត្រូវបានចោទប្រកាន់ដោយ បញ្ជូនឈីបដែលគេហាមឃាត់ហេីយវាជាការប្រឆាំងនឹងច្បាប់គ្រប់គ្រងការនាំចេញ។

ប្រសិនបើត្រូវផ្តន្ទាទោស អ្នកទាំងពីរអាចជាប់ពន្ធនាគាររយៈពេលដល់ទៅ២០ឆ្នាំ។​ ទោះយ៉ាងណា​ Geng ត្រូវបានដោះលែងឲ្យនៅក្រៅឃុំ​ ដោយការដាក់ប្រាក់តម្កល់ ប្រមាណ​ ២៥០,០០០ដុល្លារ​ និង​ Yang នៅតែជាប់ឃុំ ដោយការសាកសួរតាមផ្លូវច្បាប់គ្រោងធ្វើឡើងថ្ងៃទី១២ ខែសីហា ២០២៥។​ ការសម្រេចបន្ទាប់របស់តុលាការសម្រាប់អ្នកទាំងពីរគ្រោងធ្វើនៅថ្ងៃទី១១ ខែកញ្ញា ២០២៥។

គួរជម្រាបថា​ ចាប់ពីខែតុលា ឆ្នាំ២០២២ សហរដ្ឋអាមេរិកបានដាក់ច្បាប់កាន់តែតឹងរឹងលើការនាំចេញឈីប AI ទៅចិន ដើម្បីទប់ស្កាត់ការរីកចម្រើនផ្នែក AI របស់ចិន៕