(បរទេស)៖ ក្រុមហ៊ុន Skyworks Solutions ដែលជាអ្នកផ្គត់ផ្គង់របស់ក្រុមហ៊ុន Apple បានព្យាករណ៍ពីប្រាក់ចំណូល និងប្រាក់ចំណេញប្រចាំត្រីមាសទី ៤ ដែលលើសពីការរំពឹងទុករបស់ Wall Street នៅថ្ងៃអង្គារ។ ព័ត៌មាននេះបានធ្វើឱ្យតម្លៃភាគហ៊ុនរបស់ក្រុមហ៊ុនកើនឡើងប្រមាណ ១០% ក្នុងការជួញដូរពេលយប់។ នេះបើយោងតាមការចេញផ្សាយដោយ CNA នៅថ្ងៃទី០៦ សីហា ២០២៥។

ភាពជោគជ័យនេះបានមកពីតម្រូវការដ៏ខ្លាំងក្លាសម្រាប់បន្ទះឈីប Analog របស់ក្រុមហ៊ុន Skyworks ដែលត្រូវបានប្រើប្រាស់យ៉ាងទូលំទូលាយនៅក្នុងវិស័យទូរស័ព្ទដៃ និងយានយន្ត ទោះបីជាមានបញ្ហាសេដ្ឋកិច្ចពិភពលោកក៏ដោយ។ លោក Phil Brace នាយកប្រតិបត្តិក្រុមហ៊ុនបានបញ្ជាក់ថា កំណើននេះត្រូវបានជំរុញដោយបច្ចេកវិទ្យា IoT, យានយន្ត និងមជ្ឈមណ្ឌលទិន្នន័យ។

យោងតាមទិន្នន័យដែលចងក្រងដោយ LSEG ក្រុមហ៊ុន Skyworks រំពឹងថាប្រាក់ចំណូលនៅត្រីមាសទី ៤ នឹងស្ថិតនៅចន្លោះពី ១ ពាន់លានដុល្លារ ទៅ ១.០៣ ពាន់លានដុល្លារ ដែលខ្ពស់ជាងការប៉ាន់ស្មានរបស់អ្នកវិភាគដែលត្រឹមតែ ៨៨៧.៤ លានដុល្លារ។ ជាមួយគ្នានេះ ប្រាក់ចំណេញក្នុងមួយហ៊ុនក៏ត្រូវបានព្យាករណ៍ថា នឹងកើនឡើងដល់ ១.៤០ ដុល្លារ ខ្ពស់ជាងការរំពឹងទុកត្រឹម ៩៧ សេន។

សម្រាប់ត្រីមាសទី ៣ កន្លងទៅ Skyworks ក៏បានរាយការណ៍ពីប្រាក់ចំណូលចំនួន ៩៦៥ លានដុល្លារ ដែលលើសពីការរំពឹងទុកផងដែរ៕