ក្រុមហ៊ុន «ជីប ម៉ុង រីថែល» ប្រកាសស្វែងរក និងទទួលយកផលិតផលខ្មែរទាំងអស់ ដាក់លក់ក្នុងផ្សារទំនើបធំៗរបស់ខ្លួន
06-08-2025 12:35
(ភ្នំពេញ)៖ នេះជាឱកាសល្អសម្រាប់ក្រុមហ៊ុន និងអ្នកផលិតផលិតផលគ្រប់ប្រភេទនៅក្នុងស្រុក ខណៈពេលនេះក្រុមហ៊ុន ជីប ម៉ុង រីថែល ដែលជាបុត្រសម្ព័ន្ធរបស់ក្រុមហ៊ុន ជីប ម៉ុង គ្រុប បង្កើតដោយកូនខ្មែរ ១០០ ភាគរយ បានប្រកាសស្វែង និងរកទទួលយកផលិតផលទាំងអស់ ដែលផលិតដោយខ្មែរយើង មកដាក់លក់នៅក្នុងផ្សារទំនើបធំៗទាំងអស់របស់ខ្លួន។

សម្រាប់គោលបំណង នៃការទទួលដាក់លក់ផលិតផលខ្មែរនៅលើផ្សារទំនើបនេះ គឺក្រុមហ៊ុន ជីប ម៉ុង រីថែល ចង់លើកកម្ពស់ផលិតផលទាំងនោះ ឲ្យមានទីផ្សារកាន់តែខ្លាំង និងបានទៅដល់ដៃអតិថិជន ដែលជាអ្នកប្រើប្រាស់។ ជាពិសេស គឺដើម្បីជំនួសផលិតផលដែលនាំចូលពីប្រទេសជិតខាង ដែលមាននៅទីផ្សារកម្ពុជាយើងយ៉ាងច្រើននាពេលកន្លងមក។ មួយវិញទៀត ក៏ចូលរួមក្នុងការអនុវត្ដតាមការណែនាំរបស់រាជរដ្ឋាភិបាល ដែលបានជំរុញឲ្យប្រជាពលរដ្ឋកម្ពុជាគ្រប់រូប ចូលរួមគាំទ្រ និងទិញផលិតផលខ្មែរ យកទៅប្រើប្រាស់ ប្រកបដោយស្មារតីជាតិនិយម និងបណ្តុះមនសិការ «ខ្មែរស្រឡាញ់ខ្មែរ ខ្មែរប្រើប្រាស់ ផលិតផលខ្មែរ ជាមោទនភាពជាតិខ្មែរ» ដើម្បីរួមចំណែកធ្វើឱ្យផលិតកម្មក្នុងស្រុកបន្តមានស្ថេរភាព សំដៅលើកកម្ពស់ កិត្យានុភាពជាតិ និងភាពម្ចាស់ការ។
កន្លងមកនេះ លោកស្រី លី សុខឆេង អគ្គនាយិការក្រុមហ៊ុន ជីប ម៉ុង រីថែល គឺតែងតែខ្នះខ្នែងនៅក្នុងការស្វែងរកទីផ្សារ ឲ្យអ្នកផលិតក្នុងស្រុកតាមគ្រប់រូបភាព។ ជាក់ស្ដែងថ្មីៗនេះលោកស្រី ក៏ទើបនឹងបង្កើតនូវផ្សារទេសចរណ៍ខ្មែរមួយឈ្មោះថា «ភូមិខ្មែរអ្នកធ្វើ» ដែលជាកន្លែងប្រមូលផ្ដុំទៅដោយផលិតផលខ្មែររាប់រយមុខ មានទាំងអាហារ សំភារៈប្រើប្រាស់ វត្ថុអនុស្សវរីយ៍ និងគ្រឿងលំអរខ្មែរ មានទីតាំងស្ថិតនៅជាន់ទី១ នៃផ្សារទំនើប ជីប ម៉ុង ២៧១ មេងហ្គាម៉ល ហើយផ្សារទេសចរណ៍ខ្មែរមួយនេះ នឹងបើកសម្ពោធជាផ្លូវការក្នុងអំឡុងខែកញ្ញាខាងមុខ។
សូមជម្រាបថា បច្ចុប្បន្ននេះក្រុមហ៊ុន ជីប ម៉ុង រីថែល មានផ្សារទំនើបធំៗជាច្រើនដូចជា ផ្សារទំនើប ជីប ម៉ុង ២៧១ មេហ្គាម៉ល, ផ្សារទំនើប ជីប ម៉ុង ណូរ៉ូ លែន, ផ្សារទំនើប ជីប ម៉ុង ៥៩៨, ផ្សារទំនើប ជីប ម៉ុង សែន សុខ អៅលេត, ជីប ម៉ុង បាក់ទូក សេនធើ និងផ្សារទំនើប ជីប ម៉ុង ស៊ុបភឺម៉ាឃីត ជាច្រើនកន្លែងផ្សេងទៀត។ ដូច្នេះសម្រាប់លោកអ្នកដែលមានផលិតផលនៅក្នុងដៃ និងចង់ដាក់លក់ ឬជួលទីតាំង នៅក្នុងៅលើផ្សារទំនើបធំៗខាងលើ របស់ក្រុមហ៊ុន ជីប ម៉ុង រីថែល អាចធ្វើការការទំនាក់ទំនងសាកសួរព័ត៌មានជួលទីតាំង ជាមួយក្រុមការងារបានតាមរយៈលេខទូរស័ព្ទ ០៩៣ ៩២២ ៨៨៨៕
ក្រុមការងារជួលទីតាំង : 093 922 888 / 010 932 364
ក្រុមការងារផ្សារ ជីប ម៉ុង ស៊ុបភឺម៉ាឃីត : 092 453 378