(ភ្នំពេញ)៖ CTG & CIMIF 2025 បានបើកសម្ពោធជាផ្លូវការនៃការតាំងពិព័រណ៍ម៉ាស៊ីន និងសម្លៀកបំពាក់ដ៏ធំបំផុតនៅកម្ពុជា ត្រូវបានប្រារព្ធឡើងយ៉ាងជោគជ័យ និងមានកិតិ្តយសបំផុត ដែលប្រព្រឹត្តិឡើងនៅមជ្ឃមណ្ឌលសន្និបាត និងពិព័រណ៍កោះពេជ្រ នៅព្រឹកថ្ងៃទី០៦ ខែសីហា ឆ្នាំ២០២៥នេះ។ ពិធីសម្ពោធនេះមានការចូលរួមក្រោមអធិបតីភាពលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នៃកម្ពុជា ដែលបានថ្លែងសុន្ទរកថាបើកពិធីដោយលើកសង្ខេប អំពីសារៈសំខាន់នៃការច្នៃប្រឌិតឧស្សាហកម្ម និងការលូតលាស់នៃពាណិជ្ជកម្មនៅប្រទេសកម្ពុជា។ ពិធីនេះបានទទួលស្វាគមន៍ពីភ្ញៀវ កិត្តិយសជាច្រើនទាំងជាតិ និងអន្ដរជាតិ រួមមានសមាគមជាច្រើនព្រមទាំងតំណាងក្រសួងពាណិជ្ជកម្ម, ក្រសួងកសិកម្ម រុក្ខាប្រមាញ់ និងនេសាទ, ក្រុមប្រឹក្សាអភិវឌ្ឍន៍កម្ពុជា ,សភាពាណិជ្ជកម្មកម្ពុជា និងសមាគមវាយនភ័ណ្ឌ សម្លៀកបំពាក់ ស្បែកជើង និងផលិតផលធ្វើដំណើរក្នុងកម្ពុជា។ ការចូលរួមរបស់ភ្ញៀវកិត្តិយសទាំងអស់ បញ្ជាក់ពីសារៈសំខាន់នៃការតាំងពិព័រណ៍នេះ ក្នុងការពង្រឹងប្រព័ន្ធអេកូស៊ីស្ទឹមឧស្សាហកម្មនៅកម្ពុជា និងជំរុញសហប្រតិបត្តិការអន្តរជាតិ។

បន្ទាប់ពីរយៈពេលជិត៦ឆ្នាំ ការតាំងពិព័រណ៍ពាណិជ្ជកម្មឧស្សាហកម្មឈានមុខគេនៅកម្ពុជា គឺការតាំងពិព័រណ៍ឧស្សាហកម្មសម្លៀកបំពាក់ និងវាយនភ័ណ្ឌកម្ពុជាអន្តរជាតិ (CTG) និងពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ (CIMIF) នឹងវិលត្រឡប់មកសារជាថ្មីម្តងទៀក្នុងឆ្នាំ២០២៥។ ការតាំងពិព័រណ៍នេះរៀបចំដោយក្រុមហ៊ុន Yorkers Trade & Marketing Service Co., Ltd. សហរៀបចំដោយសភាពាណិជ្ជកម្មកម្ពុជា (CCC) និងសមាគមវាយនភ័ណ្ឌ សម្លៀកបំពាក់ ស្បែកជើង និងផលិតផលធ្វើដំណើរក្នុងកម្ពុជា (TAFTAC) និងទទួលបានការគាំទ្រជាផ្លូវការពីក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រុមប្រឹក្សាអភិវឌ្ឍន៍កម្ពុជា (CDC)។ ការតាំងពិព័រណ៍នេះនឹងប្រព្រឹត្តទៅចាប់ពីថ្ងៃទី៦ ដល់ថ្ងៃទី៩ ខែសីហា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។

CTG & CIMIF 2025 គឺជាវេទិការដ៏សំខាន់មួយ សម្រាប់អ្នកជំនាញ អ្នកធ្វើការច្នៃប្រឌិត និងវិនិយោគិន ដើម្បីស្វែងយល់អំពីទិដ្ឋភាពឧស្សាហកម្មផលិតកម្ម ដែលកំពុងរីកចម្រើនយ៉ាងឆាប់រហ័សនៅប្រទេសកម្ពុជា។ នៅក្នុងព្រឹត្តការណ៍ពិព័រណ៍នេះមាន ចំនួនស្តង់ដែលដាក់បង្ហាញជាង ២០០ស្តង់ មកពីប្រទេស និងតំបន់ចំនួន ១៥ផេ្សងៗគ្នា រួមមានអាល់ហ្សេរី បង់ក្លាដេស
កម្ពុជា ចិន ឥណ្ឌា ជប៉ុន ប៉ូឡូញ សិង្ហបុរី អាហ្វ្រិកខាងត្បូង អេស្បាញ ស្វីស តៃវ៉ាន់ តួកគី សហរដ្ឋអាមេរិក និងវៀតណាម នឹងដាក់បង្ហាញបច្ចេកវិទ្យាចុងក្រោយបំផុត លើផ្ទៃដីនៃការតាំងពិព័រណ៍ជាង ៦,០០០ម៉ែត្រការ៉េ។

ការតាំងពិព័រណ៍ដ៏មានឥទ្ធិពល CTG & CIMIF 2025 ដើរតួយ៉ាងសំខាន់ក្នុងវិស័យឧស្សាហកម្មអន្តរជាតិ នៅពេលដែលវិស័យផលិតកម្មរបស់កម្ពុជាកំពុងចូលទៅ ក្នុងយុគសម័យថ្មីនៃការរីកចម្រើនទំនើប និងភាពចម្រុះ CTG 2025 និង CIMIF 2025 ត្រៀមបង្ហាញបច្ចេកវិទ្យាឈានមុខគេក្នុងវិស័យ សម្លៀកបំពាក់ វាយនភ័ណ្ឌ ប្លាស្ទិក ការបោះពុម្ព ឧស្សាហកម្មយានយន្ត និងផ្នែកកសិកម្ម។ នៅក្នុង CTG 2025 ក្រុមហ៊ុនផលិតម៉ាស៊ីនដេរក្រណាត់ ឈានមុខគេនឹងក្លាយជាកន្លែងទាក់ទាញចម្បង ដោយបង្ហាញនូវនវានុវត្តន៍ទំនើបៗដែលជំរុញប្រសិទ្ធភាព ការបំលែងទៅជាស្វ័យប្រវត្តិកម្ម ប្រកបដោយចីរភាព។ ក្រុមហ៊ុនម៉ាស៊ីនដេរឈានមុខដូចជា ZOJE, HIKARI, NEW SHUNFA និង LEJIANG នឹងបង្ហាញអំពីការច្នៃប្រឌិតថ្មីៗរបស់ពួកគេ ក្នុងបច្ចេកវិទ្យាស្នូល ដែលផ្តោតលើល្បឿននៃការដេរ ភាពត្រឹមត្រូវ និងប្រព័ន្ធស្វ័យប្រវត្តិដែលជួយសន្សំថាមពល។ ក្រុមហ៊ុន IECHO (BO ZHAN) នឹងបង្ហាញនូវប្រព័ន្ធកាត់ឌីជីថលទំនើបបំផុត ខណៈពេលដែល QIANG LONG និង CIXING នឹងណែនាំបច្ចេកវិទ្យា Flat Knitting ជំនាន់ក្រោយដែលរចនាឡើង សម្រាប់ការផលិតដ៏មានភាពបត់បែន និងល្បឿនលឿន។

នៅក្នុងផ្នែកការវេចខ្ចប់ ខណៈដែលក្រុមហ៊ុន YKK នឹងបង្ហាញផលិតផល ដែលរចនាឡើងសម្រាប់ភាពរឹងមាំ ប្រសិទ្ធភាព និងការរចនាបទថ្មី។ ផលិតផលសំខាន់ផ្សេងទៀតរួមមានម៉ាស៊ីនច្រវាក់ខ្សែផលិតកម្មទំនើបរបស់ HENGHUI ប្រព័ន្ធថ្មីដែលមានប្រសិទ្ធភាពខ្ពស់របស់ RICOMA និងដំណោះស្រាយកែច្នៃក្រណាត់ទំនើបៗពី DILMENLER និង JAY CHEMICAL ដែលសុទ្ធសឹងតែផ្តោតលើប្រសិទ្ធភាពផ្នែកបរិស្ថាន និងភាពត្រឹមត្រូវខ្ពស់។

ស្របពេលជាមួយគ្នា CIMIF 2025 នឹងបង្ហាញពីការជំរុញក្នុងវិស័យឧស្សាហកម្មរបស់កម្ពុជា ដោយផ្តល់នូវដំណោះស្រាយបច្ចេកវិទ្យាជាច្រើនស្ទើរគ្រប់វិស័យ។ នៅក្នុងនោះរួមមានវិស័យបោះពុម្ព យីហោឈានមុខដូចជា DRUCKER, LEIBINGER VIETNAM និង CHESPA នឹងបង្ហាញពីប្រព័ន្ធដែលមានប្រសិទ្ធភាពខ្ពស់ និងភាពត្រឹមត្រូវ ដែលរចនាឡើងសម្រាប់បំពេញតម្រូវការផ្លាស់ប្តូរនៅទីផ្សារវេចខ្ចប់ និងធ្វើការស្លាកសញ្ញានៅតំបន់អាស៊ីអាគ្នេយ៍។ ចំណែកឯផ្នែកប្លាស្ទិច និងកៅស៊ូ ក៏មានការចូលរួមយ៉ាងច្រើនពីយីហោឈានមុខដូចជា JOBBETTER, HENGCAI MASTERBATCH, BOLISON, CHUMPOWER, SING-FU-SUN, KURARAY, MOMENTIVE PERFORMANCE MATERIALS, HMI, DOW, EXXONMOBIL, OMYA, REPOSL, SASOL & ASB។ អ្នកតាំងពិព័រណ៍ទាំងនេះនឹងណែនាំសម្ភារៈច្នៃប្រឌិតថ្មីៗ បច្ចេកវិទ្យាការចេញម៉ូតដ៏ទំនើប និងដំណោះស្រាយវេចខ្ចប់ប្រកបដោយចីរភាព ដែលគាំទ្រការផ្លាស់ប្តូរទៅសេដ្ឋកិច្ចរង្វង់ និងការផលិតឈានមុខគេក្នុងតំបន់។
នៅក្នុងផ្នែកសម្ភារៈ និងគ្រឿងបន្លាស់យានយន្ត អ្នកតាំងពិព័រណ៍មានដូចជា TSUBAKIMOTO, WIPOTEC, ILLINOIS និង ATOW នឹងបង្ហាញពីការរចនាឡើង​ ដើម្បីបង្កើនការអភិវឌ្ឍគ្រឹះស្ថានលូជីស្ទិច និងការដឹកជញ្ជូនកាន់តែរីកចម្រើននៅប្រទេសកម្ពុជា។ ផ្នែកវិស័យបច្ចេកវិទ្យាកសិកម្មវិញ SUNCUE នឹងបង្ហាញប្រព័ន្ធសំណើមដំណាក់កាលខ្ពស់ រចនាឡើងដើម្បីបង្កើនប្រសិទ្ធភាពបន្ទាប់ពីការប្រមូលផល កាត់បន្ថយការបាត់បង់ផលិតផល និងបង្កើនគុណភាពនៃកសិកម្ម។

ការឈរលើសេដ្ឋកិច្ចកំពុងរីកចម្រើន៖
វិស័យផលិតកម្មរបស់កម្ពុជា ត្រូវបានគេគ្រោងថានឹងមានការលូតលាស់ចំនួន ៨.៦% នៅឆ្នាំ២០២៥ ខណៈដែលផលិតផលឧស្សាហកម្មនឹងកើនឡើងចំនួន ៩.៣% នៅឆ្នាំ ២០២៦។ ក្នុងពេលដែលវិស័យកាត់ដេរសម្លៀកបំពាក់ និងស្បែកជើងនៅតែជាកំណើនស្នូលនៃសេដ្ឋកិច្ច ថែមទាំងមានវិស័យថ្មីៗដូចជា ឧបករណ៍អេឡិចត្រូនិក ការកែច្នៃអាហារ និងគ្រឿងសង្ហារឹមបែបម៉ូឌុល ក៏កំពុងទទួលបានកំណើនយ៉ាងចំណាប់អារម្មណ៍ផងដែរ។ យុទ្ធនាការរបស់រដ្ឋាភិបាលកម្ពុជាដែលកំពុងអនុវត្ត រួមមានការធ្វើឱ្យប្រសើរឡើងនៃហេដ្ឋារចនាសម្ព័ន្ធ ការគាំទ្រដល់អាជីវកម្មតូចមធ្យម (SME) និងការផ្លាស់ប្តូរទៅជាប្រព័ន្ធឌីជីថល (5G, cloud និងការផលិតឆ្លាតវៃ) ដែលកំពុងជួយលើកកម្ពស់សេដ្ឋកិច្ចរបស់កម្ពុជា ឱ្យក្លាយជាគន្លងឧស្សាហកម្មក្នុងតំបន់ដែលកំពុងឈានទៅមុខគេ។ គោលនយោបាយយុទ្ធសាស្ត្រដូចជា យុទ្ធសាស្ត្រអភិវឌ្ឍស្បែកជើង និងកាបូប ឆ្នាំ ២០២២–២០២៧ ក៏ជាសញ្ញាសំខាន់មួយ បង្ហាញពីការរីកចម្រើនឡើងតាមខ្សែសង្វាក់ផលិតផលកម្មក្នុងស្រុក។

ការតាំងពិព័រណ៍ ក៏ជាចលករធំមួយសម្រាប់ការប្រែប្រួលវិស័យឧស្សាហកម្ម៖
ចាប់ពីថ្ងៃទី៦ ដល់ថ្ងៃទី៨ ខែសីហា ក្នុងព្រឹត្តិការណ៍ពិព័រណ៍ក៏បានរៀបចំកិច្ចពិភាក្សាជាច្រើន ក៏មានការចូលរួមពី មន្ត្រីរដ្ឋាភិបាល និងអ្នកជំនាញវិស័យឧស្សាហកម្ម ដើម្បីពិភាក្សាលើប្រធានបទសំខាន់ៗ ដែលកំពុងបង្កើតនឹងបំលែងអនាគត វិស័យឧស្សាហកម្មនៅប្រទេសកម្ពុជា។ កិច្ចពិភាក្សាអំពីវិស័យចម្បងៗដូចជា ការរីកចម្រើនផ្នែកបច្ចេកវិទ្យា ស្វ័យប្រវត្តិកម្ម និងការរួមបញ្ចូលជាមួយខ្សែសង្វាក់ផ្គត់ផ្គង់សកល ដោយផ្តល់ឱ្យអ្នកចូលរួមនូវចំណេះដឹង អាចអនុវត្តបានសម្រាប់ជួយដោះស្រាយបញ្ហាបច្ចុប្បន្ន និងទទួលយកឱកាសថ្មីៗ។

កម្មវិធីសំខាន់ៗលើកិច្ចពិភាក្សាលើប្រធានបទរួមមាន «ការអភិវឌ្ឍន័ ឧស្សាហកម្ម ប្រកនដោយ និរន្តរភាព» រៀបចំដោយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនាវានុវត្តន៍, កិច្ចពិភាក្សាស្តីពី «ឱកាសធុរកិច្ច និងវិនិយោគនៅកម្ពុជា» ដោយក្រសួងពាណិជ្ជកម្ម, កិច្ចពិភាក្សាស្តីពី «ការព្រងឹងប្រព័ន្ធឧស្សាហកម្មផលិតកម្មក្នុងប្រទេសកម្ពុជា តួនាទីនៃការប្រើប្រាស់ម៉ាស៊ីនស័្វយប្រវត្តិ និងបច្ចេកវិទ្យាជំនាន់ថ្មីក្នុងខ្សែសង្វាក់ផលិតកម្ម» ដោយសភាពាណិជ្ជកម្មកម្ពុជា។ CTG & CIMIF 2025 មិនត្រឹមតែនៅជាការបង្ហាញផលិតផលពាណិជ្ជកម្មប៉ុណ្ណោះទេ ប៉ុន្តែជាវេទិកាយុទ្ធសាស្ត្រមួយ ដែលគាំទ្រយ៉ាងសកម្មដល់ចក្ខុវិស័យរយៈវែងរបស់កម្ពុជា ក្នុងការក្លាយជាប្រទេសមានចំណូលមធ្យមខ្ពស់ក្នុងឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០។

តាមរយៈការលើកកម្ពស់សហការអន្តរជាតិ ការបង្ហាញនូវនវានុវត្តន៍ និងការជំរុញការផ្លាស់ប្តូរទៅឌីជីថល ពិព័រណ៍ទាំងនេះនឹងមានតួនាទីសំខាន់ ក្នុងការប្រែប្រួលនាពេលអនាគត សម្រាប់វិស័យឧស្សាហកម្មរបស់កម្ពុជា។
សម្រាប់ព័ត៌មានបន្ថែម សូមចូលទៅកាន់៖
https://www.chanchao.com.tw/CTG/
https://www.chanchao.com.tw/CIMIF/
ឬផេសប៊ុកជាផ្លូវការ ៖ https://www.facebook.com/CamboExpo។

ពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ លើកទី៩, ពិព័រណ៍ឧស្សាហកម្មសម្លៀកបំពាក់ និងវាយនភ័ណ្ឌកម្ពុជាអន្តរជាតិ លើកទី៩ មានទីតាំងនៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ នៅថ្ងៃទី០៦ ដល់ថ្ងទី០៨ ខែសីហា ឆ្នាំ២០២៥ ចាប់ពីម៉ោង៩៖០០នាទី ដល់ម៉ោង១៧៖០០នាទី។ ចំណែកនៅថ្ងៃទី០៩ ខែសីហា ឆ្នាំ២០២៥ ចាប់ពីម៉ោង៩៖០០នាទី ដល់ម៉ោង ១៥៖០០នាទី។ សម្រាប់ការចូលរួមទស្សនា គឺមានតែអ្នកជំនាញតែប៉ុណ្ណោះ ហើយកុមារក្រោមអាយុ ១៦ឆ្នាំ គឺមិនអនុញ្ញាតឱ្យចូលទស្សនាបានទេ៕