(វ៉ាស៊ីនតោន)៖ ខ្សែប្រយុទ្ធជួរមុខ Son Heung-min បានបង្ហាញខ្លួនផ្លូវការ ក្នុងក្លិបថ្មី Los Angeles FC ក្នុងក្របខណ្ឌលីគកំពូល Major League Soccer ជាមួយតម្លៃផ្ទេរចេញពី Tottenham Hotspur ប្រមាណ ២០លានផោន។ នេះបើយោងតាមការចេញផ្សាយដោយ BBC។

នៅទឹកដីថ្មីសហរដ្ឋអាមេរិក ក្រោយចំណាយពេលលេងនៅទឹកដីអឺរ៉ុប ក្នុងប្រទេសអាល្លឺម៉ង់ និងអង់គ្លេសរួចមក Son វ័យ ៣៣ឆ្នាំ បានព្រមព្រៀងចុះកិច្ចសន្យារយៈពេល ២ឆ្នាំ ជាមួយនឹងជម្រើសតបាន ២៤ខែទៀតផងដែរជាមួយ LAFC។

ថ្លែងក្នុងការបង្ហាញខ្លួននាថ្ងៃទី០៦ ខែសីហា ឆ្នាំ២០២៥ ប្រធានក្រុមជម្រើសជាតិកូរ៉េខាងត្បូងរូបនេះបានឱ្យដឹងថា «LAFC បានផ្លាស់ប្តូរបេះដូងខ្ញុំ ដែលមិនត្រឹមតែជាជម្រើសទី១ សម្រាប់ខ្ញុំផងនោះទេ។ វាជាក្តីសុបិនក្លាយជាការពិត។ LA គឺជាទីក្រុងដ៏អស្ចារ្យ»។

គួរបញ្ជាក់ផងថា ការចូលរួមរបស់ Son គាប់ជួន LAFC បានកំពុងស្ថិតនៅលេខរៀងទី៦ ជាបណ្តោះអាសន្នក្នុង MLS ប្រចាំតំបន់ Western Conference និងបានរួមក្រុមឡើងវិញជាមួយអតីតអ្នកចាំទីរបស់ Spurs គឺ Hugo Lloris៕