(បរទេស)៖ គណៈគ្រប់គ្រងនៃកម្មវិធីវាយកូនបាល់ US Open របស់សហរដ្ឋអាមេរិក បានប្រកាសពីការបង្កើនប្រាក់រង្វាន់មានដល់ទៅ ៥លានដុល្លារសម្រាប់វិញ្ញាសាវាយទោលបុរស-នារី ដែលជាចំនួនដ៏ច្រើនបំផុតមួយ បើធៀបនឹងកម្មវិធីផ្សេងៗទៀត។ នេះបើយោងតាមការចេញផ្សាយដោយ BBC។

នេះមានន័យថា វាមានការកើនឡើងប្រមាណ ៣៩% នៃវិញ្ញាសាឯកត្តជន បើធៀបនឹងឆ្នាំចាស់ ២០២៤ ពោលគឺម្ចាស់ជើងឯកក្នុងកម្រិត Grand Slam មួយទទួលបានត្រឹមតែ ៣.៦លានដុល្លារប៉ុណ្ណោះ ដែលមាន Jannik Sinner និង Aryna Sabalenka ជាម្ចាស់ជើងឯក។

ជាមួយគ្នានោះដែរ ទឹកប្រាក់សរុបដើម្បីដំណើរការព្រឹត្តិការណ៍ជារៀងរាល់ឆ្នាំនេះដែរ នឹងកើនដល់ ៩០លានដុល្លារផងដែរ ច្រើនជាងឆ្នាំ២០២៤ ដែលចំណាយអស់ ៧៥លានដុល្លារ បើធៀបនឹង Wimbledon របស់អង់គ្លេសក្នុងឆ្នាំនេះចាយអស់ ៥៣.៥លានផោន ដោយម្ចាស់ជើងឯកផ្នែកបុរស-នារី ទទួលបាន ៣លានផោន ក្នុងម្នាក់។

ទន្ទឹមគ្នានោះ US Open បានគូសបញ្ជាក់ផងថា គ្រប់អត្តពលិកដែលហាលអាវត្រឹមជុំទី១ (first round) ក៏នឹងទទួលបានទឹកប្រាក់ចំនួន ១១០,០០០ដុល្លារត្រឡប់ទៅផ្ទះវិញដែរ ដោយមានការកើនឡើង ១០% បន្ទាប់ពីកាលដើមឆ្នាំ២០២៥ កីឡាករ-កីឡាការិនីជួរមុខប្រមាណ ២០នាក់បានសរសេរលិខិតចំហរួមគ្នាមួយ ផ្ញើទៅកាន់ព្រឹត្តិការណ៍ធំទាំង៤ ដែលស្ថិតក្នុង Grand Slam ក្នុងសំណើសុំដំឡើងប្រាក់រង្វាន់ជយលាភីនេះ៕