(បរទេស)៖ ក្រុមហ៊ុនបច្ចេកវិទ្យាចិន Betavolt បានប្រកាសបង្ហាញនូវ ថ្មនុយក្លេអ៊ែរដ៏ទំនើបមួយដែលមានទំហំតូចប៉ុនកាក់សេនចិនប៉ុណ្ណោះ។ ថ្មនេះអាចផ្តល់ថាមពលដល់ឧបករណ៍ក្នុងរយៈពេលយូរដ៏អស្ចារ្យដោយមិនចាំបាច់បញ្ចូលថ្មឡើងវិញ។ ថ្មនេះប្រើប្រាស់ថាមពល betavoltaic ដែលដំណើរការដោយអ៊ីសូតូបវិទ្យុសកម្ម Nickel-63 ដើម្បីបង្កើតចរន្តអគ្គិសនីថេរ។

យោងតាមរបាយការណ៍បានឱ្យដឹងថា ម៉ូដែលបច្ចុប្បន្នអាចប្រើប្រាស់បានរហូតដល់ ៥០ ឆ្នាំ ខណៈម៉ូដែលនាពេលអនាគតត្រូវបានរំពឹងថានឹងអាចប្រើបានរហូតដល់ ១០០ ឆ្នាំឯណោះ។ លក្ខណៈពិសេសនេះធ្វើឱ្យវាស័ក្តិសមបំផុតសម្រាប់ការប្រើប្រាស់លើឧបករណ៍អេឡិចត្រូនិកខ្នាតតូច យានអវកាស និងឧបករណ៍វេជ្ជសាស្ត្រដែលដាក់បញ្ចូលក្នុងខ្លួនមនុស្សដូចជា ឧបករណ៍បេះដូងសិប្បនិមិត្ត (pacemakers) ជាដើម។

គួរជម្រាបថា បច្ចេកវិទ្យាស្រដៀងគ្នានេះធ្លាប់ត្រូវបានគេសិក្សានិងប្រើប្រាស់តាំងពីទសវត្សរ៍ឆ្នាំ ១៩៧០ ប៉ុន្តែដោយសារមានទំហំធំ និងថ្លៃ ទើបគេបានបោះបង់ចោល។ ថ្មថ្មីរបស់ Betavolt បានប្រើប្រាស់ការរចនាដ៏ទំនើបដោយដាក់អ៊ីសូតូប Nickel-63 នៅចន្លោះ Diamond Semiconductor ដែលធ្វើឱ្យវាមានសុវត្ថិភាពខ្ពស់ និងមិនមានការបំភាយកាំរស្មីគ្រោះថ្នាក់ឡើយ។ នៅពេលដែលថ្មអស់ថាមពល អ៊ីសូតូប Nickel-63 នឹងប្រែទៅជាសារធាតុទង់ដែងដែលមិនមានវិទ្យុសកម្ម និងមិនប៉ះពាល់ដល់បរិស្ថាន៕