(បរទេស)៖ លោកស្រី Linda Yaccarino ដែលជាអតីតនាយកប្រតិបត្តិ (CEO) វេទិកាបណ្ដាញសង្គម X បានចូលកាន់តំណែងជាប្រធានក្រុមហ៊ុន eMed Population Health ដែលជាក្រុមហ៊ុនបច្ចេកវិទ្យាសុខភាព (telehealth) ផ្ដោតលើថ្នាំសម្រកទម្ងន់ប្រភេទ GLP-1។ ការចូលកាន់តំណែងនេះបានធ្វើឡើងមួយខែបន្ទាប់ពីលោកស្រីបានលាលែងពីក្រុមហ៊ុន X របស់លោក Elon Musk បន្ទាប់ពីរយៈពេល ២ ឆ្នាំដ៏លំបាក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៦ ខែសីហា ឆ្នាំ២០២៥។

ទោះបីជាគ្មានបទពិសោធន៍ក្នុងវិស័យសុខាភិបាលក៏ដោយ ក៏លោកស្រី Yaccarino មានជំនាញយ៉ាងស៊ីជម្រៅក្នុងការបង្កើតភាពជាដៃគូជាមួយម៉ាកយីហោ និងការបង្កើនចំណូលឌីជីថល។ លោកស្រីបានថ្លែងថា៖ «ខ្ញុំបានដឹកនាំក្រុមហ៊ុន X ឱ្យឆ្លងកាត់ការរីកចម្រើនដ៏ធំធេង ហើយខ្ញុំពិតជាមានមោទនភាពចំពោះអ្វីដែលយើងបានសម្រេចក្នុងអំឡុងពេលដ៏សំខាន់បែបនេះ... ពេលនេះវាជាពេលវេលាដ៏ល្អឥតខ្ចោះសម្រាប់បញ្ហាប្រឈមថ្មីមួយ»។

តាមរយៈបទពិសោធន៍​ នៅក្រុមហ៊ុន NBCUniversal លោកស្រីបានធ្វើទំនើបកម្មអាជីវកម្មពាណិជ្ជកម្មសកលអស់រយៈពេលមួយទសវត្សរ៍។ នៅក្រុមហ៊ុន X លោកស្រីបានជួយស្តារទំនុកចិត្តរបស់ក្រុមហ៊ុនផ្សាយពាណិជ្ជកម្មឡើងវិញ បន្ទាប់ពីមានភាពចលាចលក្រោមការគ្រប់គ្រងរបស់លោក Musk។

ក្រុមហ៊ុន eMed ដែលមានមូលដ្ឋាននៅទីក្រុង Miami ត្រូវបានបង្កើតឡើងក្នុងឆ្នាំ ២០២០។ ក្រុមហ៊ុននេះសហការជាមួយនិយោជក និងក្រុមហ៊ុនធានារ៉ាប់រងដើម្បីគ្រប់គ្រងការប្រើប្រាស់ថ្នាំ GLP-1 ដែលជាប្រភេទថ្នាំព្យាបាលជំងឺធាត់ ឬលើសគីឡូ និងទឹកនោមផ្អែម។ ក្រុមហ៊ុននេះអះអាងថា វេទិការបស់ខ្លួនអាចកាត់បន្ថយការចំណាយលើកម្មវិធីសម្រកគីឡូបានរហូតដល់ ៥០% ដោយផ្ដល់ការថែទាំតាមតម្រូវការភ្លាមៗ។

គួរជម្រាបថា ការចូលកាន់តំណែងរបស់លោកស្រី Yaccarino គឺស្របពេលដែលទីផ្សារថ្នាំសម្រកទម្ងន់ GLP-1 កំពុងមានការប្រកួតប្រជែងយ៉ាងខ្លាំង ហើយអ្នកជំនាញយល់ថា ទេពកោសល្យរបស់លោកស្រីក្នុងការធ្វើទីផ្សារឌីជីថលគឺមានសារៈសំខាន់សម្រាប់ក្រុមហ៊ុន eMed៕