(សៀមរាប)៖ ថ្នាក់ដឹកនាំធនាគារឯកទេស ខេប៊ី ដេហាន ម.ក (ហៅកាត់ថា ធនាគារ KDSB) ដោយមានការចូលរួមពីនាយកប្រតិបត្តិ ធនាគារ KDSB ព្រមទាំងបុគ្គលិក នាថ្ងៃទី៧ ខែសីហា ឆ្នាំ២០២៥នេះ បានអញ្ជើញចុះ សួរសុខទុក្ខ ព្រមទាំងនាំយកនូវអំណោយមួយចំនួន ចែកជូនដល់ប្រជាពលរដ្ឋដែលកំពុងភៀសសឹក ចំនួន ២០០គ្រួសារ ដែលបានស្នាក់ នៅបណ្តោះអាសន្ននៅវត្តសរសរស្តម ស្ថិតក្នុងស្រុកពួក ខេត្តសៀមរាប។

ក្នុងឱកាសនោះ លោកនាយកប្រតិបត្តិធនាគារ KDSB បានលើកឡើងថា ថ្ងៃនេះពួកយើងមិនត្រឹមតែនាំយកអំណោយជូនបងប្អូនប៉ុណ្ណោះទេ តែពួកយើងមកចូលរួមចែករំលែកទឹកចិត្ត សាមគ្គីជាមួយបងប្អូនជនរួមជាតិទាំងអស់គ្នា។ យើងយល់ច្បាស់ចំពោះការភ័យខ្លាចថប់អារម្មណ៍ និងការប្រឈមជាមួយបញ្ហាជីវភាពប្រចាំថ្ងៃដែលបងប្អូនជួបប្រទះក្នុងស្ថានការណ៍តាមបណ្តោយព្រំដែនថ្មីៗនេះ។ ការដែលត្រូវបានបង្ខំឲ្យចាកចេញពីផ្ទះរបស់ខ្លួនគឺជារឿងមួយដែលធ្វើឲ្យពួកយើងទាំងអស់គ្នាមានអារម្មណ៍សោកស្តាយជាខ្លាំង។ បើទោះបីជាស្ថិតក្នុងស្ថានភាពដ៏លំបាកក៏ដោយ ពួកយើងនៅតែការពារ និងគាំទ្រ ជួយគ្នាទៅវិញទៅមក ដោយសារបងប្អូនបានបង្ហាញនូវភាពក្លាហាន និងភាពអត់ធ្មត់យ៉ាងពិតប្រាកដ។

សម្រាប់ ធនាគារ KDSB យើងជឿជាក់ថា យើងមិនមែនគ្រាន់តែជាស្ថាប័នហិរញ្ញវត្ថុប៉ុណ្ណោះទេ ប៉ុន្តែយើងគឺជាសមាជិកម្នាក់ ដែលមានមេត្តាសណ្តោសប្រណី ហើយឈរនៅទីនេះ ជាមួយបងប្អូនទាំងអស់គ្នា។ ដូច្នេះហើយពួកយើងសង្ឃឹមយ៉ាងមុតមាំថា ទាំងនេះមិនត្រឹមតែជាអំណោយធម្មតា នោះទេប៉ុន្តែជាកំលាំងចិត្ត ជាជំហានតូចមួយដ៏មានអត្ថន័យ ដើម្បីជួយឱ្យបងប្អូន អាចងើបឈរឡើងវិញ។

ជាពិសេសអំណោយដែលពួកយើងបាននាំយកមកត្រូវបានរៀបចំដោយការចូលរួមបរិច្ចាគយ៉ាងស្មោះស្ម័គ្រពីបុគ្គលិក KDSB គ្រប់គ្នា។ យើងសង្ឃឹមយ៉ាងជ្រាលជ្រៅថា រាល់ការ ចែករំលែកបន្តិចបន្តួចនេះ អាចជួយសម្រួល ដល់ការរស់នៅប្រចាំថ្ងៃរបស់បងប្អូន និងផ្តល់នូវក្តី សង្ឃឹម ក៏ដូចជា ស្នាមញញឹមឡើងវិញម្តងទៀត។

ជាចុងបញ្ចប់ លោកនាយកប្រតិបត្តិ បានថ្លែងអំណរគុណ និងផ្តល់ការគោរពយ៉ាងជ្រាលជ្រៅចំពោះ វីរភាពដ៏ក្លាហានរបស់បងប្អូន ហើយធនាគារ KDSB សន្យាថានឹងបន្តការចូលរួម ចែករំលែក ដើម្បីពួកយើងអាចទទួលបាននូវភាពរីកចម្រើនជាមួយគ្នា ។

សូមបញ្ជាក់ផងដែរថា អំណោយដែលថ្នាក់ដឹកនាំ ធនាគារ KDSB បាននាំយកទៅប្រគល់ជូនដល់បងប្អូនប្រជាពលរដ្ឋភៀសសឹក សុទ្ធសឹងតែជាស្បៀងអាហារ និងថវិកាសម្រាប់ ២០០គ្រួសារ។ លើសពីនេះ ធនាគារ បាន ប្រគេន ទេយ្យវត្ថុជូន ចៅ អធិការ វត្ត និងអំណោយខ្លះទៀតដល់អ្នក រៀបចំ និងមើលការខុសត្រូវនៅទីនោះផងដែរ។

សម្រាប់ព័ត៌មានបន្ថែមអំពីសេវាហិរញ្ញវត្ថុរបស់ ធនាគារ KDSB សូមទំនាក់ទំនងតាមរយៈ៖

Hotline: (+855) 17 991 555 / 66 611 555 / 98 961 961
Website: https://www.kdsb.com.kh
Facebook: https://www.facebook.com/kbdaehan
Instagram: https://www.instagram.com/kbdaehanbank/
LinkedIn: https://www.linkedin.com/in/kb-daehan-bank-984722178/
Telegram: t.me/KDSBCambodia
YouTube: http://www.youtube.com/@KBDaehanSpecializedBankPlc