(វ៉ាស៊ីនតោន)៖ កីឡាករប្រដាល់ក្បាច់គុនចម្រុះ MMA គឺ Khamzat Chimaev សញ្ជាតិរុស្ស៊ី បានសំដែងនូវការដឹងគុណ ចំពោះប្រធានាធិបតី Donald Trump ក្រោយទទួលបានវីសា (visa) ដើម្បីប្រកួតនៅទឹកដីសហរដ្ឋអាមេរិកឡើងវិញ។ នេះបើយោងតាមការចេញផ្សាយដោយ BBC។

ជើងខ្លាំងវ័យ ៣១ឆ្នាំរូបនេះ បានទទួលជ័យជម្នះនៅលើសង្វៀនទាំង ៨ប្រកួតតែម្តង គិតចាប់តាំងពីឡើងវ៉ៃប្រដាល់ក្នុងទ្រុង UFC នាអំឡុងឆ្នាំ២០២០ មក។

វាក៏ជាលើកដំបូងផងដែរ ក្នុងរយៈពេលជិត ៣ឆ្នាំមកនេះដែល Chimaev ទទួលបានការអនុញ្ញាតទៅប្រកួតនៅអាមេរិកវិញ ក្រោយភាពតានតឹងផ្នែកនយោបាយនៃប្រទេសទាំងពីរ។

កីឡាករទម្ងន់មធ្យម Chimaev រកបានជ័យជម្នះទាំង ១៤លើកក្នុងអាជីពប្រដាល់របស់លោកតែម្តង ដែលត្រៀមធ្វើដំណើរទៅកាន់អាមេរិកជាលើកដំបូងឡើងវិញ គិតចាប់តាំងពីឆ្នាំ២០២២ ក្រោយផ្តួលគូប្រជែង Dricus du Plessis នៅឯសង្វៀន UFC 319 ស្ថិតក្នុងទីក្រុង Chicago នៃរដ្ឋ Illinois កាលពីថ្ងៃទី១៦ ខែសីហា។

Chimaev បានថ្លែងថា «វាពុំមែនជាការគេចវេស ឬជាកំហុសរបស់ខ្ញុំទេ ដែលមិនបានប្រកួតនៅអាមេរិក។ ដូចអ្នករាល់គ្នាដឹងស្រាប់ហើយថា ខ្ញុំគ្មាន visa ធ្វើដំណើរទៅអាមេរិកឡើយ ដែលជំនួសឱ្យប្រកួតនៅទីក្រុង Abu Dhabi វិញ។ បច្ចុប្បន្នលោក Donald Trump នៅទីនេះ យើងនឹងទៅប្រកួតបានវិញ»។

ទោះជាយ៉ាងណា កីឡាកររូបនេះមិនរំពឹងទទួលបានការអញ្ជើញចូលរួមកម្មវិធី UFC នាឆ្នាំក្រោយនៅមុខសេតវិមាន White House ឡើយ ដែលជាទិវាខួបលើកទី២៥០ នៃបុណ្យឯករាជ្យសហរដ្ឋអាមេរិក៕