(បរទេស)៖ ក្រុមហ៊ុន SMIC ដែលជាក្រុមហ៊ុនផលិតបន្ទះឈីបធំជាងគេរបស់ចិន បានអះអាងថា គោលនយោបាយពន្ធគយរបស់សហរដ្ឋអាមេរិក មិនបានបង្កឱ្យមាន «វិបត្តិធ្ងន់ធ្ងរ» ដូចការព្រួយបារម្ភកាលពីដំបូងឡើយ។ យោងតាមសហនាយកប្រតិបត្តិ (CO-CEO) លោក Zhao Haijun បានឱ្យដឹងថា ទោះបីជាមានការប្រកាសពីការដំឡើងពន្ធ ១០០% លើការនាំចូលបន្ទះឈីបពីសំណាក់លោក Donald Trump ក៏ដោយ ក៏ក្រុមហ៊ុនរំពឹងថាផលប៉ះពាល់នឹងមានកម្រិតតូចតាច ដោយសារតែក្រុមហ៊ុនបានរៀបចំផែនការទប់ស្កាត់រួចហើយ។

តាមរយៈការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៨ ខែសីហា ឆ្នាំ២០២៥ នេះ ទោះបីជាចំណូលរបស់ក្រុមហ៊ុន SMIC នៅក្នុងត្រីមាសទីពីរបានកើនឡើង ១៦.២% ដល់ ២.២ ពាន់លានដុល្លារក៏ដោយ ក៏ប្រាក់ចំណេញរបស់ក្រុមហ៊ុនបានធ្លាក់ចុះ ១៩.៥% មកត្រឹម ១៣២.៥ លានដុល្លារ ដែលខុសពីការព្យាករណ៍របស់អ្នកវិភាគ។ ក្នុងនោះ ប្រទេសចិននៅតែជាទីផ្សារដ៏សំខាន់សម្រាប់ក្រុមហ៊ុន ដែលមានចំណែក ៨៤% នៃប្រាក់ចំណូល ខណៈដែលសហរដ្ឋអាមេរិកបានរួមចំណែក ១២.៩%។ លោក Zhao បានបញ្ជាក់ថា ការដំឡើងពន្ធគយពីមុនមកបានបង្កើនថ្លៃដើមតិចជាង ១០% សម្រាប់អតិថិជនក្រៅប្រទេស ហើយភាគីពាក់ព័ន្ធក៏បានរកអ្នកផ្គត់ផ្គង់ផ្សេងទៀត ឬស្តុកទំនិញរួចរាល់ហើយដែរ។

លោក Zhao ក៏បានបន្ថែមទៀតថា សមត្ថភាពផលិតរបស់ក្រុមហ៊ុននៅតែមមាញឹក ហើយនឹងបន្តដំណើរការពេញលេញរហូតដល់ខែតុលា ដោយសារតម្រូវការដ៏រឹងមាំពីការជំនួសផលិតផលក្នុងស្រុក។ ដូច្នេះ ក្រុមហ៊ុនរំពឹងថាផលប៉ះពាល់នៃពន្ធគយថ្មីនេះនឹងកាន់តែតូចទៅ។ គួរកត់សម្គាល់ផងដែរថា ភាគហ៊ុនរបស់ក្រុមហ៊ុន SMIC បានធ្លាក់ចុះជាង ៥% នៅក្នុងការជួញដូរនៅហុងកុងនៅថ្ងៃសុក្រសប្តាហ៍នេះ៕