(បរទេស)៖ នាយកប្រតិបត្តិក្រុមហ៊ុន Apple លោក Tim Cook បង្ហាញថា iPhone 16 គឺជាម៉ូដែលដែលពេញនិយមបំផុតនៅលើពិភពលោកនាពេលបច្ចុប្បន្ននេះ។ លោកបញ្ជាក់បែបនេះនៅថ្ងៃទី០១ ខែសីហា ឆ្នាំ២០២៥ ក្នុងបទសម្ភាសន៍ជាមួយ CNBC និងក្នុងកិច្ចប្រជុំពីលទ្ធផលហិរញ្ញវត្ថុត្រីមាសទី៣ (បញ្ចប់ថ្ងៃទី២៨ មិថុនា)។

ក្រុមហ៊ុន Apple រកចំណូលបានពីការលក់ iPhone រហូតដល់ ៤៤.៦ពាន់លានដុល្លារ ដែលកើនឡើង ១៣% បើប្រៀបធៀបនឹងឆ្នាំមុន ដោយសារ​តែ​សមិទ្ធផលលក់ iPhone 16។ លោក Tim Cook បន្ថែមថា iPhone 16 គ្រប់ម៉ូដែលរួមមាន Standard, Plus, Pro និង Pro Max ទទួលបានការពេញចិត្តយ៉ាងខ្លាំងពីអ្នកប្រើប្រាស់ iPhone ដែលសម្រេចធ្វើការប្តូរទៅម៉ូដែលថ្មីៗទាំងនេះ។ តាមរបាយការណ៍ពី Counterpoint Research សម្រាប់ត្រីមាសទី១ ឆ្នាំ២០២៥ បានបង្ហាញថា iPhone 16 ម៉ូដែលស្តង់ដារ បានក្លាយជាស្មាតហ្វូនដែលលក់ដាច់បំផុតលើពិភពលោក ជាលើកដំបូងក្នុងរយៈពេល២ឆ្នាំ។ នៅប្រទេសចិន ទោះមានការប្រកួតប្រជែងខ្លាំងពីស្មាតហ្វូនតម្លៃទាប ក៏ម៉ូដែល iPhone 16 Pro នៅតែរក្សាទុកភាគរយលក់ដាច់ជាងពាក់កណ្តាលនៃផលិតផលសរុបរបស់ Apple។ ក្រុមហ៊ុន Apple ក៏ទទួលបានសមិទ្ធផលដ៏ធំមួយដោយលក់បាន iPhone លើស ៣ពាន់លានគ្រឿង ចាប់តាំងពីការចេញលក់ដំបូងនៅឆ្នាំ២០០៧។ សម្រាប់ត្រីមាសទី៣ ឆ្នាំហិរញ្ញវត្ថុ២០២៥ Apple បានរកចំណូលសរុប ៩៤ពាន់លានដុល្លារ ដែលកើនឡើង ១០% បើប្រៀបធៀបនឹងឆ្នាំមុន។

គួរជម្រាបថា មូលហេតុដេលធ្វើឲ្យ iPhone 16 ស៊េរីទទួលជោគជ័យខ្លាំង ដោយសារតែវាទាក់ទាញអ្នកប្រើប្រាស់ចាស់ឱ្យធ្វើការអាប់ដេតទៅម៉ូដែលថ្មី ខណៈការលក់មានការកើនឡើងខ្លាំងនៅទីផ្សារដែលមានការប្រកួតប្រជែងខ្លាំងដូចជា ប្រទេសចិន ដែលជួយជំរុញចំណូល Apple ទៅកាន់កំណត់ត្រាថ្មី និងការចូលសមិទ្ធផលលក់លើស ៣ពាន់លានគ្រឿង៕