(បរទេស)៖ កីឡាការិនីវាយកូនបាល់ទោល Emma Raducanu បាននិយាយថា នឹងពិតជារំភើបខ្លាំងណាស់ ដោយបានលោក Francis Roig មកបង្វឹក ស្របពេលនាងបានកំពុងត្រៀមលេងកម្មវិធីធំ US Open នាឆ្នាំនេះផងដែរ។ នេះបើយោងតាមការចេញផ្សាយដោយ BBC។

កីឡាការិនីសញ្ជាតិអង់គ្លេស វ័យ ២២ឆ្នាំរូបនេះ បានស្ថិតក្រោមការបង្វឹករបស់លោក Mark Petchey ក្រៅផ្លូវការគិតចាប់តាំងពីខែមីនា មុនពេលបញ្ចូលគ្រូបង្វឹកសញ្ជាតិអេស្ប៉ាញ Roig ចូលទៅក្នុងក្រុមគ្រូបង្វឹកពេញម៉ោងរបស់នាង ដែលជាអតីតគ្រូបង្វឹកចាស់របស់ជើងខ្លាំង Rafael Nadal ដែលបានចូលនិវត្តន៍។

លោក Roig វ័យ ៥៧ឆ្នាំ ធ្លាប់បានធ្វើការងារជាមួយពូរបស់ Nadal គឺលោក Toni ពីឆ្នាំ២០០៥ ដល់ឆ្នាំ២០២២ និងបានរួមចំណែកជួយជ្រោមជ្រែង Nadal ឈ្នះជើងឯក ២២សម័យ ក្នុងក្របខណ្ឌ Grand Slam ទៀតផង។

ជាមួយគ្នានោះ Raducanu បានថ្លែងថា «លោក Roig គឺជាគ្រូបង្វឹកពោរពេញដោយបទពិសោធន៍មួយរូប ធ្វើឱ្យខ្ញុំរីករាយខ្លាំងណាស់ ក្នុងការបន្តធ្វើការជាមួយគាត់»។

Raducanu បានយកលោក Roig មកបង្វឹកនាអំឡុងកម្មវិធី WTA 1000 នៅឯរដ្ឋ Ohio សហរដ្ឋអាមេរិក មុនពេលកម្មវិធីចុងក្រោយរបស់ Grand Slam ប្រចាំឆ្នាំ២០២៥ ពោលគឺ US Open ចាប់ផ្តើមនៅ New York នាថ្ងៃទី២៤ ខែសីហា៕