(បរទេស)៖ សារព័ត៌មាន Bloomberg បានរាយការណ៍ថា នាយកប្រតិបត្តិ (CEO) ក្រុមហ៊ុន Tesla លោក Elon Musk បានបញ្ជាឱ្យបិទក្រុម Supercomputer Dojo ដែលទទួលបន្ទុកផ្នែកកុំព្យូទ័រដ៏ទំនើបរបស់ក្រុមហ៊ុន ហើយប្រធានក្រុមគឺលោក Peter Bannon ក៏បានចាកចេញផងដែរ។ កុំព្យូទ័រ Dojo នេះត្រូវបានបង្កើតឡើងដើម្បីដំណើរការទិន្នន័យ និងវីដេអូពីរថយន្តអគ្គិសនីរបស់ Tesla សម្រាប់បណ្តុះបណ្តាលកម្មវិធីបើកបរស្វ័យប្រវត្តិ។ នេះបើយោងតាមការចេញផ្សាយបន្តដោយទីភ្នាក់ងារសារព័ត៌មាន Reuters នៅថ្ងៃទី០៨ ខែសីហា ឆ្នាំ២០២៥។

របាយការណ៍បន្តថា ក្រុមនេះទើបតែបាត់បង់បុគ្គលិកប្រហែល ២០ នាក់ទៅឱ្យក្រុមហ៊ុនថ្មីឈ្មោះ DensityAI ហើយបុគ្គលិកដែលនៅសល់ត្រូវបានផ្លាស់ទៅកាន់គម្រោងមជ្ឈមណ្ឌលទិន្នន័យ និងគម្រោងកុំព្យូទ័រផ្សេងៗទៀត។ ការសម្រេចចិត្តបិទក្រុមនេះ គឺជាផ្នែកមួយនៃយុទ្ធសាស្ត្រថ្មីរបស់ Tesla ដែលងាកមកផ្តោតលើបច្ចេកវិទ្យា AI និងមនុស្សយន្ត ក៏ដូចជាការពឹងផ្អែកកាន់តែខ្លាំងលើដៃគូខាងក្រៅដូចជា Nvidia, AMD និង Samsung សម្រាប់តម្រូវការឈីប។ កាលពីខែមុន Samsung ទើបតែបានទទួលកិច្ចព្រមព្រៀងដ៏ធំមួយមានតម្លៃ ១៦,៥ ពាន់លានដុល្លារដើម្បីផ្គត់ផ្គង់ឈីប AI ដល់ក្រុមហ៊ុន Tesla ដែលត្រូវបានគេរំពឹងថានឹងប្រើប្រាស់សម្រាប់រថយន្តស្វ័យប្រវត្តិ មនុស្សយន្ត និងមជ្ឈមណ្ឌលទិន្នន័យ។

គួរជម្រាបថា ការសម្រេចចិត្តបិទក្រុម Supercomputer Dojo នេះកើតឡើងស្របពេលដែល Tesla កំពុងជួបប្រទះការចាកចេញពីថ្នាក់ដឹកនាំសំខាន់ៗជាច្រើននាក់ ព្រមទាំងការកាត់បន្ថយបុគ្គលិកមួយចំនួនធំក្នុងរយៈពេលមួយឆ្នាំចុងក្រោយនេះ៕