(ភ្នំពេញ)៖ ក្នុងបរិបទនៃប្រទេសកម្ពុជា បុគ្គលគ្រប់រូបត្រូវបានការពារសិទ្ធិដោយច្បាប់ ដោយបុគ្គលនីមួយៗមានសិទ្ធិរក្សានូវការសម្ងាត់ ឬរក្សាឯកជនភាពរបស់ខ្លួនក្នុងការធ្វើសកម្មភាព ដែលបម្រើជាផលប្រយោជន៍ស្របច្បាប់របស់ខ្លួន ។ ការឆ្លើយឆ្លងតាមលិខិត ក៏ជាសកម្មភាពមួយរបស់បុគ្គលដែលត្រូវបានច្បាប់ការពារផងដែរ ដោយពុំអនុញ្ញាតឱ្យបុគ្គលផ្សេងទៀតប៉ះពាល់ ឬធ្វើសកម្មភាពណាមួយ ដែលនាំឱ្យខូចខាតផលប្រយោជន៍នៃលិខិតឆ្លើយឆ្លងនោះឡើយ ។

តើសកម្មភាពណាខ្លះដែលចាត់ទុកថាជាការប៉ះពាល់ដល់ការឆ្លើយឆ្លងតាមលិខិត ? តើបុគ្គលដែលប៉ះពាល់នូវការឆ្លើយឆ្លងតាមលិខិតត្រូវទទួលខុសត្រូវផ្លូវច្បាប់បែបណាខ្លះ ?

ដើម្បីស្រាយចម្ងល់ខាងលើ កម្មវិធីយល់ដឹងផ្នែកច្បាប់របស់អង្គភាពសារព័ត៌មាន Fresh News សហការជាមួយ ក្រុមហ៊ុនមេធាវីកម្ពុជាសហប្រតិបត្តិការអន្តរជាតិ សូមលើកយកប្រធានបទស្ដីពី បទប៉ះពាល់ដល់ការឆ្លើយឆ្លងតាមលិខិត មកធ្វើការពន្យល់ជូនសិស្ស និស្សិត និងបងប្អូនទាំងអស់គ្នា ដូចខាងក្រោម៖

ការប៉ះពាល់ដល់ការឆ្លើយឆ្លងតាមលិខិត គឺជាអំពើប៉ះពាល់ ដូចជាការបើកមើល អាន ដោយគ្មានការអនុញ្ញាត នូវខ្លឹមសារ ឬបង្វែរលិខិតដែលបុគ្គលម្នាក់បានផ្ញើទៅឱ្យបុគ្គលម្នាក់ទៀត ក្នុងចេតនាទុច្ចរិត ដែលនាំឱ្យប៉ះពាល់ដល់ការសម្ងាត់ ផលប្រយោជន៍ស្របច្បាប់របស់ម្ចាស់លិខិត ។ បើពុំដូច្នោះទេ ជនដែលប្រព្រឹត្តនឹង ត្រូវទទួលខុសត្រូវចំពោះមុខច្បាប់ ស្របតាមបញ្ញត្តិមាត្រា ៣១៧ នៃក្រមព្រហ្មទណ្ឌ ដែលបានចែងថា អំពើបើក បំបាត់ចោល ធ្វើឱ្យយឺតយ៉ាវ ឬបង្វែរលិខិតឆ្លើយឆ្លងដែលផ្ញើទៅតតិយជន ដោយគំនិតទុច្ចរិត ត្រូវផ្តន្ទាទោសដាក់ពន្ធនាគារ ពី ១ (មួយ) ខែ ទៅ ១ (មួយ) ឆ្នាំ និងពិន័យជាប្រាក់ពី ១០០.០០០ (មួយសែន) រៀល ទៅ ២.០០០.០០០ (ពីរលាន) រៀល ។ ត្រូវផ្តន្ទាទោសដូចគ្នា ចំពោះអំពើប្រព្រឹត្តដោយទុច្ចរិត មើលលិខិតឆ្លើយឆ្លងដែលផ្ញើទៅតតិយជន ។

ឧទាហរណ៍៖ លោក A បានផ្ញើលិខិតចំនួន ០១ ច្បាប់ ទៅឱ្យលោក C តាមរយៈលោក B ដែលខ្លឹមសារនៃលិខិតនោះគឺជាផែនការអាជីវកម្ម រវាងលោក A និង លោក C ប៉ុន្តែលោក B ដែលជាអ្នកទទួលបញ្ញើលិខិតបែរជាបើកមើល ខ្លឹមសារនៃលិខិតនោះ ដោយគ្មានការអនុញ្ញាត និងបង្វែរលិខិតនោះទៅឱ្យជនផ្សេងទៀតដើម្បីផលប្រយោជន៍ផ្ទាល់ខ្លួន ដែលនាំឱ្យប៉ះពាល់ដល់ការសម្ងាត់របស់លោក A និងលោក C ថែមទាំងខូចខាតផលប្រយោជន៍របស់លោក A និងលោក C ដោយសារផែនការអាជីវកម្មត្រូវបានបែកធ្លាយទៅជនផ្សេងទៀត ។

សរុបជារួមមក បទប៉ះពាល់ដល់ការឆ្លើយឆ្លងតាមលិខិត គឺជាអំពើដែលប៉ះពាល់ដល់ការសម្ងាត់ឯកជន ដោយគ្មានការអនុញ្ញាត ដែលនាំឱ្យបាត់បង់ផលប្រយោជន៍របស់បុគ្គល ។ ដែលអំពើនេះ នឹងត្រូវទទួលខុសត្រូវចំពោះមុខច្បាប់ជាធរមាន ស្របតាមបញ្ញត្តិមាត្រា ៣១៧ នៃក្រមព្រហ្មទណ្ឌ ដូចមានរៀបរាប់ខាងលើ ។

រៀបរៀងដោយ៖ លោកមេធាវី បូរិន្ទ ឬទ្ធិរាជ និងលោក ថន ផានិត ជាសមាជិកក្រុមការងាររៀបចំ និងផ្សព្វផ្សាយអត្ថបទច្បាប់ នៃក្រុមហ៊ុនមេធាវីកម្ពុជាសហប្រតិបត្តិការអន្តរជាតិ មានអាសយដ្ឋាននៅអគារស៊ីអាយស៊ី (CIC) លេខ ១២៦៥ ផ្លូវលំ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ទូរស័ព្ទទំនាក់ទំនងលេខ ០២៣ ៩៨៦ ២៤៥/០៧៨ ២៧២ ៧៨៥ អ៉ីម៉ែល៖ [email protected] គេហទំព័រ៖ www.cicfirm.com, ហ្វេសប៊ុកផេក៖ Cambodia International Cooperation Law Firm ៕