(បរទេស)៖ ប្រទេសចិនបានដាក់ចេញនូវប្រព័ន្ធទូទាត់ប្រាក់ថ្មីមួយ ដែលអនុញ្ញាតឱ្យអ្នកប្រើប្រាស់ធ្វើប្រតិបត្តិការដោយគ្រាន់តែ គ្រវីបាតដៃពីលើម៉ាស៊ីនស្កេន ដោយមិនចាំបាច់ប្រើប្រាស់កាតធនាគារ លេខសម្ងាត់ (PIN) ឬស្មាតហ្វូនឡើយ។ ប្រព័ន្ធដ៏ទំនើបនេះត្រូវបានគេស្គាល់ថាជា «Palm Payment»។

យោងតាមការបង្ហោះនៅលើបណ្តាញសង្គម LinkedIn របស់លោក Girish Kumar Ramaiah បានឱ្យដឹងថា ម៉ាស៊ីនស្កេននេះអាចចាប់យក លំនាំសរសៃឈាមវ៉ែនតែមួយគត់ នៅលើបាតដៃរបស់អតិថិជន ហើយភ្ជាប់វាទៅនឹងគណនីធនាគាររបស់ពួកគេផ្ទាល់តែម្តង។ បច្ចេកវិទ្យាច្នៃប្រឌិតថ្មីនេះត្រូវបានដឹកនាំដោយក្រុមហ៊ុនបច្ចេកវិទ្យាយក្សដូចជា Tencent ជាមួយប្រព័ន្ធ WeChat Pay និង Alipay ជាមួយម៉ាស៊ីនស្កេន PL1 របស់ខ្លួន។

ទោះបីជាប្រព័ន្ធនេះត្រូវបានគេសាទរចំពោះប្រសិទ្ធភាព និងភាពងាយស្រួលក៏ដោយ ក៏វាបានបង្កឱ្យមានការព្រួយបារម្ភជាច្រើនផងដែរ។ អ្នកជំនាញមួយចំនួនបានលើកឡើងពីហានិភ័យនៃ សុវត្ថិភាពទិន្នន័យ និងលទ្ធភាពនៃការ ឃ្លាំមើល ឯកជនភាពរបស់អ្នកប្រើប្រាស់ ដោយសារទិន្នន័យជីវមាត្រ (Biometric Data) នៅលើបាតដៃមិនអាចផ្លាស់ប្តូរបានឡើយ។

គួរជម្រាបថា ការអភិវឌ្ឍន៍ដ៏ធំនេះកំពុងក្លាយជាប្រធានបទដ៏ក្តៅគគុកមួយសម្រាប់ពិភាក្សា ខណៈដែលប្រទេសចិនកំពុងប្រឹងប្រែងឆ្ពោះទៅរកសង្គមដែលលែងប្រើប្រាស់សាច់ប្រាក់ និងកាតជាអចិន្ត្រៃយ៍៕