(ភ្នំពេញ)៖ គណៈគ្រប់គ្រង និងបុគ្គលិករបស់ធនាគារ ហត្ថា នៅថ្ងៃទី១០ សីហា ២០២៥ បាននាំយកអំណោយចែកជូនស្បៀងអាហារ ដល់ប្រជាពលរដ្ឋភៀសខ្លួនចំនួន ១,៥០០គ្រួសារ ដែលបានរងផលប៉ះពាល់ពីបញ្ហាព្រំដែន នៅតាមទីទួលសុវត្ថិភាពចំនួន ០៣ផ្សេងគ្នាក្នុង ខេត្តឧត្តមានជ័យ។

នាឱកាសនោះដែរ លោក មិន សុផា ប្រធាននាយកប្រតិបត្តិនៃធនាគារ ហត្ថា បានបញ្ជាក់ថា សម្ភារៈជំនួយរួមមាន៖ អង្ករ ៤០តោន, មី ១,៥០០កេស និងត្រីខកំប៉ុង ២,១០០យួរ ដែលកើតចេញពីការចូលរួមបរិច្ចាគតាមរយៈមូលនិធិរបស់បុគ្គលិក និងធនាគារ ហត្ថា។

លោក មិន សុផា បានបន្ដថា អំណោយដ៏តិចតួចនេះ គឺសម្រាប់ជួយសំរាលទុកបងប្អូនទាំងអស់គ្នា នៅក្នុងគ្រាលំបាករយៈពេលខ្លីនេះ ហើយអំណោយទាំងនេះគឺបានមកពីការបរិច្ចាគរបស់បុគ្គលិករបស់ធនាគារ ហត្ថាមួយចំនួន និងមួយចំនួនទៀតជាការរួមចំណែកពីធនាគារផ្ទាល់។

ធនាគារ ហត្ថា ជាធនាគារពាណិជ្ជ ដែលមានវត្តមាននៅក្នុងព្រះរាជាណាចក្រកម្ពុជាអស់រយៈកាលជាង ៣០ឆ្នាំមកហើយ ដែលបានផ្តល់ជូនសេវាហិរញ្ញវត្ថុយ៉ាងទូលំទូលាយ ដល់អតិថិជនរបស់ខ្លួន ដែលរួមានអតិថិជនជាលក្ខណៈបុគ្គល សហគ្រាសខ្នាតតូច និងមធ្យម (SME) ព្រមទាំងស្ថាប័នសាអាជីវកម្មធំៗជាច្រើនទៀត។

សូមជម្រាបថា ធនាគារ ហត្ថា គឺជាសមាជិករបស់ MUFG ដែលជាសម្ព័ន្ធហិរញ្ញវត្ថុធំមួយ របស់ប្រទេសជប៉ុន ដែលមានសាខាប្រហែល ២000 ទីតាំង ស្ថិតនៅក្នុងទីផ្សារជាង ៤០ ក្នុងពិភពលោក។ សម្ព័ន្ធក្រុមហ៊ុនផ្តល់សេវាកម្មហិរញ្ញវត្ថុ MUFG បានការចុះបញ្ជីនៅលើផ្សារហ៊ុន (Tokyo Stock Exchange), ណាហ្គូយ៉ា (Nagoya Stock Exchange) និងញូយ៉ក (New York Stock Exchange) ដោយមានតម្លៃទីផ្សាររហូតដល់ ២៤.២៧ កោដិយាន់ និងប្រាក់ចំណេញសុទ្ធចំនួន ១.៥៩១,១ ពាន់លានយាន់ នៅត្រឹមចុងខែមីនា ឆ្នាំ ២០២៥៕