(បរទេស)៖ ក្រុមបាល់ទាត់ Crystal Palace បានបរាជ័យពីការប្តឹងជំទាស់ UEFA ចំពោះការដកកៅអីពានលំដាប់ទី២ អឺរ៉ុប Europa League ដែលពួកគេត្រូវកាត់ទៅលេងពានលំដាប់ទី៣ វិញគឺ Conference League រដូវកាលថ្មីនេះ។

នេះជាសេចក្តីសម្រេចចុងក្រោយពីតុលាការកីឡា CAS នៅថ្ងៃចន្ទ ទី១១ ខែសីហា ឆ្នាំ២០២៥ នៅពេលដែល Nottingham Forest ក៏ត្រូវបានប្រកាសពីការទទួលបានកៅអីរបស់ក្រុមឥន្រ្ទីខាងលើ ដើម្បីលេងពាន UEL នារដូវកាលឆ្នាំ២០២៥-២៦ នេះដែរ។ នេះបើយោងតាមការចេញផ្សាយដោយ BBC។

ព័ត៌មានដ៏ខកចិត្តសម្រាប់ Palace នេះត្រូវបានប្រកាសឡើង បន្ទាប់ពីពួកគេទើបឈ្នះជើងឯកពានបើករដូវកាលលីគអង់គ្លេស FA Community Shield 2025 ត្រឹម ១ថ្ងៃតែប៉ុណ្ណោះ ក្រោយពេល Palace បានវាយបកឈ្នះ Liverpool ដោយបាល់ ១១ម៉េត្រកាត់សេចក្តីនៅឯកីឡដ្ឋានជាតិអង់គ្លេស Wembley ក្នុងនាមម្ចាស់ជើងឯកពាន FA Cup រដូវកាលមុន។

ក៏ប៉ុន្តែ Palace ត្រូវបាន UEFA ដកកៅអីលេងពានអឺរ៉ុបវិញ ក្រោយរកឃើញក្លិបអង់គ្លេសមួយនេះមានម្ចាស់ច្រើន ក្រោយរកឃើញអ្នកជំនួញអាមេរិក លោក John Textor មានភាគហ៊ុន ៤៣% និងជាម្ចាស់ក្លិប Lyon របស់បារាំង ដែលមានកៅអីលេងពានលំដាប់ទី២ អឺរ៉ុបនេះដែរ៕