លោក Bill Gates ធ្លាក់ចេញពីបញ្ជីកំពូលអ្នកមានទ្រព្យច្រើនបំផុតទាំង១០ របស់ពិភពលោក ក្រោយបរិច្ចាគប្រាក់ ៥២ពាន់លានដុល្លារ

12-08-2025 09:19

(បរទេស)៖ សហស្ថាបនិកក្រុមហ៊ុន Microsoft លោក Bill Gates បានធ្លាក់ចេញពីបញ្ជីកំពូលអ្នកមានទ្រព្យសម្បត្តិច្រើនបំផុតទាំង១០ របស់ពិភពលោក បន្ទាប់ពីទ្រព្យសម្បត្តិសុទ្ធរបស់លោកបានថយចុះប្រមាណ ៥២ពាន់លានដុល្លារ ឬប្រហែល ៣០% ពោកគឺចុះពី ១៧៥ពាន់លានដុល្លារមក ១២៤ពាន់លានដុល្លារ។ នេះបើតាមការរាយការណ៍របស់ Bloomberg’s Billionaires Index។

ការផ្លាស់ប្តូរនេះកើតឡើង បន្ទាប់ពី Bloomberg បានធ្វើការគណនានាពេលថ្មីនេះ ដើម្បីរាប់បញ្ចូលការប្តេជ្ញាចិត្តរបស់លោក BIll Gates ក្នុងការផ្តល់បរិច្ចាគ «ស្ទើរតែទាំងអស់» នៃទ្រព្យសម្បត្តិរបស់លោកទៅកាន់មូលនិធិ «Bill & Melinda Gates Foundation» មុនដល់ឆ្នាំ ២០៤៥។ បច្ចុប្បន្ន លោក Bill Gates ដែលជាអ្នករួមបង្កើតក្រុមហ៊ុន Microsoft ត្រូវបានចាត់ឱ្យស្ថិតនៅលំដាប់ទី១២ នៅពីក្រោយអតីតសហការី Steve Ballmer និងអ្នកមានវ័យក្មេងក្នុងវិស័យបច្ចេកវិទ្យា។

គួរជម្រាបថា លោក Gates បានលើកឡើងជាបន្តបន្ទាប់ថា លោកមិនមានបំណងទុកសម្បត្តិទាំងមូលពេលស្លាប់ឡើយ តែចង់ប្រើប្រាស់វាសម្រាប់គម្រោងសុខភាពសាធារណៈ ការអប់រំ និងការបំបាត់ភាពក្រីក្រទូទាំងពិភពលោក៕