(ម៉ាឌ្រីដ)៖ ក្រុមបាល់ទាត់ជម្រើសជាតិស្រ្តីអេស្ប៉ាញ បានសម្រេចចែកផ្លូវជាមួយលោកស្រី Monte Tome និងតែងតាំង Sonia Bermudez ចូលដឹកនាំជំនួសវិញ ក្រោយពួកគេបរាជ័យផ្តាច់ព្រ័ត្រទល់នឹងអង់គ្លេស នៅកម្មវិធីពានអឺរ៉ុប Women’s Euro 2025។ នេះបើយោងតាមការចេញផ្សាយដោយ BBC។

សហព័ន្ធបាល់ទាត់អេស្ប៉ាញបានឱ្យដឹងថា កិច្ចសន្យាថ្មីរបស់ Tome មិនត្រូវបានបន្តទៀតឡើយ ពោលគឺនៅក្រោយពេលផុតកំណត់នាថ្ងៃទី៣១ ខែសីហា ឆ្នាំ២០២៥។

គួររំលឹកផងថា លោកស្រី Tome បានក្លាយជាគ្រូបង្វឹកស្រ្តីដំបូងគេ ក្នុងការចូលដឹកនាំក្រុមជម្រើសជាតិស្រ្តីគោជល់អេស្ប៉ាញ ដែលត្រូវបានតែងតាំងកាលពីខែកញ្ញា ឆ្នាំ២០២៣ ក្នុងនាមអតីតគ្រូជំនួយរបស់លោក Jorge Vilda ដែលត្រូវបានដកតួនាទី។

នៅក្នុងសេចក្តីថ្លែងការណ៍របស់ RFEF ក៏បានថ្លែងអំណរគុណលោកស្រី Tome ចំពោះកិច្ចខិតខំប្រឹងប្រែងកន្លងមកប្រកបដោយវិជ្ជាជីវៈ និងការប្តេជ្ញាចិត្តខ្ពស់ ដោយមានស្ថិតិឈ្នះ ២៨លើក ក្នុងចំណោម ៣៧ប្រកួតសរុបនៃការដឹកនាំ៕