(បរទេស)៖ យោងតាមសេចក្ដីប្រកាសផ្លូវការពីក្រុមហ៊ុន Apple និង OpenAI បានឱ្យដឹងថា ប្រព័ន្ធប្រតិបត្តិការ iOS 26 ថ្មីនឹងត្រូវរួមបញ្ចូលជាមួយម៉ូដែល ChatGPT 5 ដែលទើបនឹងប្រកាសដាក់ឱ្យប្រើប្រាស់នាពេលថ្មីៗនេះ។ ការសហការដ៏ធំនេះនឹងនាំមកនូវបទពិសោធន៍ថ្មីប្លែក និងកម្រិតខ្ពស់នៃបញ្ញាសិប្បនិម្មិត (AI) សម្រាប់អ្នកប្រើប្រាស់ iPhone ទាំងអស់។

អ្វីទៅជា GPT-5? GPT-5 គឺជាម៉ូដែលភាសាដ៏ទំនើបបំផុតរបស់ OpenAI ដែលត្រូវបានអភិវឌ្ឍឡើងដោយផ្តោតលើភាពវៃឆ្លាត ការយល់ដឹង និងសមត្ថភាពក្នុងការវិភាគកាន់តែខ្ពស់។ បើប្រៀបធៀបទៅនឹងជំនាន់មុន GPT-5 អាចមានសមត្ថភាពខ្ពស់ដូចជា បង្កើនសមត្ថភាពការគិត គឺផ្តល់ចម្លើយដែលលម្អិត និងស៊ីជម្រៅជាងមុន ជាពិសេសទៅលើសំណួរស្មុគស្មាញ។ កែលម្អគុណភាពការសរសេរ គឺអាចសរសេរអត្ថបទ កូដកម្មវិធី និងរឿងរ៉ាវប្រកបដោយភាពច្នៃប្រឌិត និងភាពត្រឹមត្រូវខ្ពស់ និងចំណុចសំខាន់មួយទៀតគឺ អាចបកប្រែភាសាបានកាន់តែលឿន និងមានភាពជាក់លាក់។

Apple បានពន្យល់ថា មុខងារ Apple Intelligence ដែលជាឈុតកម្មវិធី AI ថ្មីរបស់ខ្លួននឹងត្រូវបានបង្កើនសមត្ថភាពដោយ GPT-5។ នេះមានន័យថា នៅពេលអ្នកប្រើប្រាស់ស្នើសុំការងារស្មុគស្មាញដល់ Siri ឬប្រើប្រាស់មុខងារសរសេរអត្ថបទ ជំនួយការឆ្លាតវៃទាំងនេះនឹងអាចបញ្ជូនសំណើទៅកាន់ GPT-5 ដើម្បីទទួលបានចម្លើយដែលលម្អិត និងត្រឹមត្រូវជាងមុន។

iOS 26 គ្រោងនឹងចេញផ្សាយជាសាធារណៈនៅពាក់កណ្ដាលខែក្រោយនេះ (ខែកញ្ញា) ដែលជាពេលវេលាប្រពៃណីនៃការដាក់បង្ហាញទូរស័ព្ទ iPhone ស៊េរីថ្មីរបស់ Apple។ Apple បានសន្យាថានឹងការពារភាពឯកជនរបស់អ្នកប្រើប្រាស់។ ក្រុមហ៊ុននឹងធ្វើការលាក់បាំងអាសយដ្ឋាន IP របស់អ្នក និងការពារមិនឱ្យ OpenAI រក្សាទុកសំណើរបស់អ្នកប្រើប្រាស់ឡើយ។

សម្រាប់មុខងារ Apple Intelligence រួមទាំងការប្រើប្រាស់ GPT-5 នឹងមាននៅលើទូរស័ព្ទ iPhone 15 Pro និងម៉ូដែលជំនាន់ក្រោយៗប៉ុណ្ណោះ។

គួរបញ្ជាក់ផងដែរថា ការរួមបញ្ចូលគ្នារវាងបច្ចេកវិទ្យាដ៏ទំនើបទាំងពីរនេះ នឹងធ្វើឱ្យការប្រើប្រាស់ទូរស័ព្ទ iPhone កាន់តែឆ្លាតវៃ មានប្រសិទ្ធភាព និងអាចបំពេញការងារប្រចាំថ្ងៃបានកាន់តែល្អប្រសើរ។ អ្នកជំនាញជាច្រើនបានយល់ឃើញថា នេះគឺជាជំហានដ៏ធំមួយក្នុងការនាំយក AI មកកាន់អ្នកប្រើប្រាស់ទូទាំងពិភពលោក៕