(បរទេស)៖ ក្រុមហ៊ុនផលិតបន្ទះឈីបកូរ៉េខាងត្បូង SK Hynix បានព្យាករណ៍ថា ទីផ្សារសម្រាប់បន្ទះឈីបអង្គចងចាំប្រភេទ HBM (High-Bandwidth Memory) ដែលត្រូវបានរចនាឡើងសម្រាប់បច្ចេកវិទ្យា AI នឹងរីកចម្រើន ៣០% ក្នុងមួយឆ្នាំរហូតដល់ឆ្នាំ ២០៣០។ នេះបើយោងតាមការលើកឡើងរបស់នាយកប្រតិបត្តិជាន់ខ្ពស់ម្នាក់របស់ក្រុមហ៊ុន ដែលត្រូវបានចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១១ ខែសីហា ឆ្នាំ២០២៥។

លោក Choi Joon-yong ដែលជាប្រធានផ្នែករៀបចំផែនការអាជីវកម្ម HBM បានបញ្ជាក់ថា ទោះបីជាមានសម្ពាធលើតម្លៃក៏ដោយ ក៏តម្រូវការ AI នៅតែមានភាពរឹងមាំខ្លាំង។ លោកបានបន្ថែមថា ការវិនិយោគរបស់ក្រុមហ៊ុនបច្ចេកវិទ្យាធំៗដូចជា Amazon, Microsoft, និង Google ទៅលើវិស័យ AI នឹងនៅតែបន្តកើនឡើង ដែលនេះជាសញ្ញាវិជ្ជមានសម្រាប់ទីផ្សារ HBM។

បច្ចុប្បន្ន SK Hynix គឺជាអ្នកផ្គត់ផ្គង់ HBM សំខាន់ដល់ក្រុមហ៊ុន Nvidia។ ដោយសារតែការរីកចម្រើននៃបច្ចេកវិទ្យា ក្រុមហ៊ុនបាននិងកំពុងផលិតបន្ទះឈីប HBM ជំនាន់ថ្មីដែលមានលក្ខណៈប្ដូរតាមតម្រូវការអតិថិជន។

លោក Choi បានបន្តថា ក្រុមហ៊ុនរំពឹងថាទីផ្សារ HBM ដែលប្ដូរតាមបំណងនេះ នឹងកើនឡើងដល់រាប់សិបពាន់លានដុល្លារនៅត្រឹមឆ្នាំ ២០៣០។ លោកបានបញ្ជាក់ទៀតថា ក្រុមហ៊ុនមានទំនុកចិត្តក្នុងការផលិតផលិតផលដែលមានគុណភាពខ្ពស់ និងមានការប្រកួតប្រជែងត្រឹមត្រូវសម្រាប់អតិថិជនរបស់ខ្លួន៕