(បរទេស)៖ Burnley, Leeds United និង Sunderland ដែលត្រៀមធ្វើព្យុះធ្វើភ្លៀងក្នុងលីគកំពូលអង់គ្លេស Premier League រដូវកាលថ្មី ២០២៥-២៥ ក៏កំពុងឈានទៅបំបែកកំណត់ត្រាចាយលុយទិញកីឡាករថ្មីចូលផងដែរ។ នេះបើយោងតាមការចេញផ្សាយដោយ BBC។

ការដែលជិតសម្រេចកិច្ចព្រមព្រៀងទិញខ្សែការពារ Omar Alderete ពីក្លិបអេស្ប៉ាញ Getafe របស់ឆ្មាខ្មៅ Sunderland ក្នុងតម្លៃ ១០លានផោននោះ នឹងញាំងឱ្យក្លិបទាំង ៣ខាងលើនេះមានការចាយវាយកើនដល់ទៅ ២៩៣.៣លានផោន ច្រើនជាងពេលណាៗទាំងអស់ ដោយគិតចាប់តាំងពីរដូវកាល ២០១៦-១៧។

ចំនួននេះនឹងបំបែកកំណត់ត្រាចាស់នារដូវក្តៅមុន នៅពេលក្រុម Southampton, Ipswich Town និង Leicester City បូកបញ្ចូលគ្នាចាយអស់ប្រមាណ ២៧៦.៥លានផោន។

ការទិញខ្សែការពារឆ្វេង សញ្ជាតិប៉ារ៉ាហ្គាយ Alderete នឹងក្លាយជាសមាជិកថ្មីទី១១ ក្នុងទីផ្សារទិញ-ដូរកីឡាករនារដូវក្តៅនេះរបស់ឆ្មាខ្មៅ ដោយចាយអស់ទឹកប្រាក់សរុប ១៣២លានផោនផងដែរ គិតចាប់តាំងពីលោក Regis le Bris ដឹកនាំប្រកួតឈ្នះនៃវគ្គជម្រុះចុងក្រោយកាលពីខែឧសភា ឆ្នាំ២០២៥។

ពួកគេត្រៀមបង្ហាញខ្លួនក្នុងលីគកំពូលអង់គ្លេសឡើងវិញ តាមរយៈ ១ប្រកួតបើកឆាករបស់ Sunderland ត្រូវតតាំងនឹង West Ham United ក្នុងដី ក្រោយពេលជ្រុះចេញពី Premier League តាំងពីរដូវកាល ២០១៦-១៧ មក៕