(ភ្នំពេញ)៖ គណៈកម្មាធិការជាតិអូឡាំពិកកម្ពុជា(NOCC) បានប្រកាសនឹងរៀបចំទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ លើកទី១០ ឡើងវិញ នាថ្ងៃទី៣១ ខែសីហា ឆ្នាំ២០២៥ នេះ ជាមួយការបង្វែរប្រធានថ្មី គឺរត់ដើម្បីសន្ដិភាព សាមគ្គីភាព ភាពសុខសាន្ដរបស់ប្រជាពលរដ្ឋ និងរក្សាការពារបេតិកភណ្ឌរបស់មនុស្សជាតិ ខណៈថវិកាទទួលបានពីការរៀបចំមួយផ្នែក នឹងប្រើប្រាស់សម្រាប់ជួយគាំទ្រដល់វីរកងទ័ពជួរមុខ និងជនភៀសសឹក ដែលរងផលប៉ះពាល់ដោយសារជម្លោះព្រំដែនកម្ពុជា-ថៃ កាលពីថ្មីៗ។

លោក វ៉ាត់ ចំរើន អគ្គលេខាធិការ NOCC បានថ្លែងក្នុងសន្និសីទសារព័ត៌មាន នៅថ្ងៃទី១២ ខែសីហានេះថា ដោយទទួលបានការអនុញ្ញាតពីថ្នាក់ដឹកនាំ NOCC និងមានសំណូមពរពីអ្នកចូលរួមរត់ ក្នុងកាលៈទេសៈប្រទេសជាតិកំពុងមានបញ្ហានៅព្រំដែន ដើម្បីចូលរួមចំណែកក្នុងការធ្វើឲ្យសកម្មភាពសង្គម រក្សានៅភាពដដែល ក៏ដូចជារួមចំណែកក្នុងស្មារតីជាតិនិយម ជាមួយប្រជាពលរដ្ឋខ្មែរផង គណៈកម្មការក៏សម្រេចរៀបចំទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ លើកទី១០ ឡើងវិញ នាថ្ងៃទី៣១ ខែសីហាខាងមុខ ដោយប្រែក្លាយព្រឹត្តិការណ៍នេះ ជាចលនារួបរួមគ្នាមួយ សម្រាប់ជួយគាំទ្រដល់កងទ័ពជួរមុខ និងជនភៀសសឹក។

លោកបន្ដថា ប្រធានបទដែលនឹងត្រូវបង្វែរមករៀបចំក្នុងខួបលើកទី១០ នៃទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ ឡើងវិញ នាចុងខែនេះ គឺមាន៖ ទី១-រត់ដើម្បីសន្ដិភាព សាមគ្គីភាព និងភាពសុខសាន្ដរបស់ប្រជាពលរដ្ឋ ទី២-រត់ដើម្បីគាំទ្រ និងការពារបេតិកភណ្ឌរបស់មនុស្សជាតិ និងទី៣-រត់ដើម្បីជួយឧបត្ថម្ភគាំទ្រដល់វីរកងទ័ពជួរមុខ និងជនភៀសសឹក ទៅតាមលទ្ធភាព បន្ថែមលើបេសកកម្មសប្បុរសធម៌ ដែលគណៈកម្មការរៀបចំ តែងបរិច្ចាគជួយដល់មន្ទីរពេទ្យកុមារ និងអង្គការផ្សេងៗជាច្រើននាឆ្នាំកន្លងមក។

ទន្ទឹមជាមួយការដាក់ចេញនូវប្រធានបទខាងលើ តាមរយៈព្រឹត្តិការណ៍រត់ចម្ងាយឆ្ងាយ ៤២គីឡូម៉ែត្រនេះ គណៈកម្មការរៀបចំ ក៏ត្រៀមភ្ជាប់ជាមួយនូវសារសំខាន់ៗមួយចំនួន ដើម្បីផ្សព្វផ្សាយឲ្យពិភពលោកបានដឹងសារៈសំខាន់នៃសន្ដិភាព ដែលប្រជាពលរដ្ឋខ្មែរគ្រប់រូបត្រូវការ ក៏ដូចជាការអំពាវនាវឲ្យអន្ដរជាតិចូលរួមថែរក្សា និងចូលរួមថ្កោលទោស ចំពោះសកម្មភាពបំផ្លិចបំផ្លាញនូវសម្បត្តិបេតិកភណ្ឌពិភពលោក ដូចជាប្រាសាទព្រះវិហារ ដែលត្រូវបានរងផលប៉ះពាល់យ៉ាងធ្ងន់ធ្ងរដោយសារត្រូវគ្រាប់ កាលពីថ្មីៗផងដែរ។

លោក វ៉ាត់ ចំរើន បានបញ្ជាក់ថា សារសំខាន់ៗ ដែលនឹងត្រូវបញ្ជ្រាបការផ្សព្វផ្សាយ កំឡុងទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ លើកទី១០ នាចុងខែនេះ រួមមាន៖

«ទី១-សារនៃការរត់ដើម្បីសន្ដិភាព សាមគ្គីភាព និងភាពសុខសាន្ដរបស់ប្រជាពលរដ្ឋ គឺជាសារដ៏សំខាន់ សម្រាប់ផ្សព្វផ្សាយទៅឆាកអន្ដរជាតិ។ សារនេះ ត្រូវបានគាំទ្រដោយថ្នាក់ដឹកនាំរបស់យើង បានន័យថា យើងចង់បានសន្ដិភាព យើងចង់បានឲ្យបទឈប់បាញ់ ដែលមានភាពជាក់លាក់ពិតប្រាកដ យើងចង់បានសន្ដិភាពពិតប្រាកដ មិនមែនជាប្រទេសដែលចង់បង្កសង្គ្រាមទេ។ នេះគឺជាសារសំខាន់ដំបូង ដែលយើងនឹងពង្រីកការផ្សព្វផ្សាយ ឲ្យប្រជាពលរដ្ឋខ្មែរក្នុងស្រុក ក៏ដូចជាសារព័ត៌មានក្រៅស្រុកគាត់ទទួលបាននូវសារនេះ។

ទី២ គឺជាសារដែលបង្កប់នូវអត្ថន័យជ្រាលជ្រៅ ចំពោះស្មារតីរបស់មនុស្សជាតិ គឺការចូលរួមគាំទ្រ និងការពារសម្បត្តិបេតិកភណ្ឌពិភពលោក ។ ការអភិរក្ស និងអភិវឌ្ឍន៍វប្បធម៌របស់សកលលោក ពិសេសសម្បត្តិបេតិកភណ្ឌដែលមានក្នុងប្រទេសទាំងអស់លើពិភពលោក ។ យើងឃើញហើយថា ប្រាសាទព្រះវិហារជាសម្បត្តិបេតិកភណ្ឌពិភពលោក ដែលមនុស្សជាតិទាំងអស់ បានទទួលស្គាល់ និងបានការការពារដោយអង្គការ UNESCO មិនមែនជាសម្បត្តិតែរបស់កម្ពុជាទេ ។ អ៊ីចឹងយើងផ្សព្វផ្សាយនូវសារដែលមានឥទ្ធិពលជាវិជ្ជមានមួយឲ្យពិភពលោកដឹងថា ខ្មែរមានសម្បត្តិបេតិកភណ្ឌច្រើនណាស់ ដែលត្រូវស្ថិតក្រោមការថែរក្សា និងឃ្លាំមើលពីមនុស្សជាតិលើពិភព ហើយធ្វើការថ្កោលទោស ចំពោះអ្នកដែលបំផ្លិចបំផ្លាញ ព្រោះការបំផ្លិចបំផ្លាញសម្បត្តិបេតិកភណ្ឌពិភពលោក ប្រៀបដូចការបំផ្លិចបំផ្លាញជីវិតមនុស្សផងដែរ។ នេះជាសារដែលយើងត្រូវរួមគ្នាផ្ញើរឲ្យពិភពលោកបានឃើញអំពីទិដ្ឋភាពទាំងអស់នេះ។

ទី៣-សារបង្ហាញពីស្ថានភាពបច្ចុប្បន្ន ទាំងនៅខេត្តសៀមរាប ក៏ដូចជាទូទាំងប្រទេសកម្ពុជា គឺនៅតែមានសុខសុវត្ថិភាពល្អធម្មតា សម្រាប់ភ្ញៀវទេសចរណ៍ជាតិ និងអន្ដរជាតិ ហើយរងចាំស្វាគមន៍ភ្ញៀវទេសចរណ៍ទាំងអស់ ក្នុងការធ្វើដំណើរកម្សាន្ដមកកាន់ប្រទេសកម្ពុជារបស់យើង ដោយគ្មានភាពភ័យខ្លាច ឬការព្រួយបារម្ភអ្វីទាំងអស់។ ដូច្នេះតាមរយៈព្រឹត្តិការណ៍នេះ ក៏ជាឱកាសមួយ ដើម្បីផ្ញើរសារទៅកាន់ពិភពលោក ដើម្បីចៀសវាងអន្ដរជាតិមួយចំនួន ឬភ្ញៀវទេសចរមួយចំនួន មានការភាន់ច្រឡំផងដែរ»។

តាមរយៈការប្រកាសរៀបចំឡើងវិញ នៃព្រឹត្តិការណ៍កីឡាទេសចរណ៍ដ៏ធំប្រចាំឆ្នាំលើទឹកដីអង្គរ កំឡុងរដូវភ្លៀងនេះ ក្រៅពីអំពាវនាវដល់អ្នកបានចុះឈ្មោះរួចត្រៀមចូលរួមឲ្យបានច្រើនកុះករ គណៈកម្មការរៀបចំ ក៏បានសម្រេចបន្ដបើកទទួលការចុះឈ្មោះចូលរួមរត់បន្ថែមផងដែរ ។ ហេតុនេះ គណៈកម្មការបានអំពាវនាវប្រជាពលរដ្ឋ ក៏ដូចជាជនបរទេសមានបំណងចង់ចូលរួមរត់ រួសរាន់ចុះឈ្មោះឲ្យបានច្រើនកុះករ។ ចំពោះវិញ្ញាសារត់ គឺមានរត់ចម្ងាយ ៤២គីឡូម៉ែត្រ, ២១គីឡូម៉ែត្រ, ១០គីឡូម៉ែត្រ និង ៣គីឡូម៉ែត្រ៕