(បរទេស)៖ លោក Thomas Dohmke នាយកប្រតិបត្តិក្រុមហ៊ុន GitHub បានប្រកាសថា លោកនឹងលាឈប់ពីតំណែងនៅក្រុមហ៊ុនដែលជាកម្មសិទ្ធិរបស់ Microsoft នេះ ដើម្បីទៅបង្កើតក្រុមហ៊ុនបច្ចេកវិទ្យាថ្មី (startup) មួយទៀត។ នេះបើយោងតាមការចុះផ្សាយរបស់សារព័ត៌មាន CNA នៅថ្ងៃទី១២ ខែសីហា ឆ្នាំ២០២៥។

លោក Dohmke បានដឹកនាំ GitHub អស់មួយរយៈ ដោយផ្តោតខ្លាំងលើការអភិវឌ្ឍ AI តាមរយៈផលិតផល Copilot។ លោកបានពន្យល់ថា មូលហេតុនៃការសម្រេចចិត្តនេះ គឺដោយសារលោកចង់ត្រឡប់ទៅធ្វើការជាស្ថាបនិកក្រុមហ៊ុនដូចកាលពីមុន។ លោកធ្លាប់បានលក់ក្រុមហ៊ុន startup របស់លោកទៅឱ្យ Microsoft រួចមកហើយ មុនពេលដែលលោកក្លាយជានាយកប្រតិបត្តិ GitHub។ ក្រុមហ៊ុន Microsoft បានទិញយក GitHub ក្នុងតម្លៃ ៧.៥ ពាន់លានដុល្លារ កាលពីឆ្នាំ ២០១៨។

ក្នុងអាណត្តិដឹកនាំរបស់លោក GitHub បានពង្រីកខ្លួនទៅកាន់ទីផ្សារសកលលោក ទទួលបានវិញ្ញាបនបត្រ FedRAMP របស់សហរដ្ឋអាមេរិកសម្រាប់ការប្រើប្រាស់ដោយរដ្ឋាភិបាលសហព័ន្ធ និងបានបង្កើនគម្រោង AI លើវេទិការបស់ខ្លួនទ្វេដង។

គួរជម្រាបថា ការផ្លាស់ប្តូរតំណែងនេះនឹងត្រូវបញ្ចប់នៅចុងឆ្នាំនេះ។ តាមការចុះផ្សាយរបស់សារព័ត៌មាន Axios បានឱ្យដឹងថា លោកស្រី Julia Liusonប្រធានផ្នែកអ្នកអភិវឌ្ឍន៍របស់ Microsoft នឹងចូលមកគ្រប់គ្រងផ្នែកសំខាន់ៗរបស់ GitHub ដូចជាផ្នែកចំណូល និងវិស្វកម្មជាដើម៕