(ភ្នំពេញ)៖ ក្រសួងអប់រំ យុវជន និងកីឡា នៅថ្ងៃទី១៣ ខែសីហានេះ បានជួបប្រជុំពិភាក្សាការងារជាមួយសហព័ន្ធកីឡាជាតិ ស្ដីពីការពង្រឹងបច្ចេកទេសក្នុងការហ្វឹកហាត់ ដើម្បីត្រៀមលក្ខណៈសម្បត្តិក្នុងការចូលរួមប្រកួតកីឡាស៊ីហ្គេម។

កិច្ចប្រជុំខាងលើ ដឹកនាំមានការចូលរួមពីលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) និងលោក សាមឺឌី ស៊ីវឌ្ឍនា រដ្ឋលេខាធិការក្រសួងអប់រំ យុវជន និងកីឡា ព្រមទាំងថ្នាក់ដឹកនាំអគ្គនាយកដ្ឋានកីឡា មជ្ឈមណ្ឌលជាតិហ្វឹកហ្វឺនកីឡា ប្រធាន អនុប្រធាន និងតំណាងសហព័ន្ធកីឡាជាតិទាំងអស់ផងដែរ។

សូមរំឮកថា កាលពីពាក់កណ្ដាលខែកក្កដាកន្លងទៅ គណៈកម្មការជ្រើសរើសប្រភេទកីឡា និងអត្តពលិកត្រៀមចូលរួមប្រកួតកីឡាស៊ីហ្គេម លើកទី៣៣ ក៏បានជួបប្រជុំពិភាក្សាជាមួយសហព័ន្ធកីឡាជាតិផងដែរ ដើម្បីជំរុញដល់ការហ្វឹកហាត់ ក៏ដូចជាធានាបាននូវការងារជ្រើសរើសកីឡាករ-កីឡាការិនី ប្រកបដោយតម្លាភាព គុណភាព និងប្រសិទ្ធភាព ក្នុងការប្រកួតស៊ីហ្គេម និងព្រឹត្តិការណ៍អន្ដរជាតិនានា។

ដោយឡែកពាក់ព័ន្ធនឹងការចូលរួមប្រកួតកីឡាស៊ីហ្គេម នាចុងឆ្នាំនេះ កន្លងមកលោក វ៉ាត់ ចំរើន ធ្លាប់បានជំរុញឲ្យសហព័ន្ធជាតិ ពិសេសកីឡាករ-កីឡាការិនីទាំងអស់ ត្រូវបន្ដពង្រឹងការខំប្រឹងហ្វឹកហាត់ ដើម្បីបង្ហាញពីការត្រៀមលក្ខណៈគ្រប់ជ្រុងជ្រោយរបស់អត្តពលិកកម្ពុជា ខណៈសភាពការណ៍ផ្សេងៗទៀត គឺរង់ចាំស្ដាប់ការណែនាំរបស់ថ្នាក់ដឹកនាំរដ្ឋមន្ដ្រីក្រសួងអប់រំ យុវជន និងកីឡា ក៏ដូចជារង់ចាំស្ដាប់ការណែនាំរបស់រាជរដ្ឋាភិបាលផងដែរ៕